Sipas Drejtorisë së Përgjithshme të Tatimeve (DPT) deri 31 korrik 2026 janë fshirë ose shuar detyrime në vlerën 410 milionë euro për 204,413 tatimpagues, ndërsa procesi vijon për të gjithë përfituesit sipas ligjit.

Administrata tatimore, kujton tatimpaguesit se procesi i faljes mbyllet në 31 dhjetor 2026.

Ligji për fshirjen e detyrimeve tatimore, doganore dhe të pushtetit vendor po zbatohet në disa faza.

Fillimisht, nga data 10 qershor deri më 30 qershor 2026 u zbatua edhe faza e pagesave për përfitimin nga falja me kusht e detyrimeve tatimore, gjobave dhe kamatëvonesave, sipas ligjit nr. 86/2025.

Për periudhën 2015–2019 përfitohet fshirje e 50% të detyrimit principal, si dhe fshirje e plotë e gjobave dhe kamatëvonesave, nëse 50% e mbetur paguhej njëherësh nga 10.06.2026 deri më 30.06.2026.

Për periudhën 2015–2019 përfitohet fshirje e 25% të detyrimit principal, si dhe fshirje e plotë e gjobave dhe kamatëvonesave. Afati për të paguar 75% të principalit, me kushtin që të fshihet pjesa e mbetur paguhet nga 10.06.2026 deri më 31.12.2026.

Për periudhën 2020–2024 përfitohet fshirje e plotë e gjobave dhe kamatëvonesave, nëse paguhet 100% e detyrimit principal nga 10.06.2026 deri më 31.12.2026.

The post Ligji i faljes, shuhen 410 mln euro detyrime në Tatime, përfituan 204 mijë biznese appeared first on Fast News Economy.

Prej pasdites të ditës së djeshme çmimi i naftës ka arritur 219 lekë për litër nga 215 lekë që ishte më parë. Nafta është rritur me 4 lekë për litër.

Shtrenjtim të ndjeshëm ka pasur edhe për çmimin e benzinës. Nga 198 lekë për litër, ka arritur 2025 lekë për litër. Rritja e benzinës është me 7 lekë për litër.

Rritja e çmimit të naftës ka reflektuar luhatjet e çmimeve në bursat e huaja.

Çmimi i naftës Platts në bursat e huaja që shërben si bazë përllogaritje për zhdoganimin dhe çmimet vendase ka arritur në 1,450 USD/ Ton nga 1,300 USD/Ton që ishte rreth 5 ditë më parë.

Importuesit vendas parashikojnë se nëse përshkallëzimet e luftës do të vijojnë çmimet e naftës me shumicë do të vijojnë  të rriten. Në këtë situatë sipas tyre e vetmja masa që do të përmbante çmimet është ulja e taksave për naftën.

Edhe sipas analizave të mediave të huaja, çmimet e naftës këtë të enjte u rritën në nivelet më të larta të tre javëve, të nxitura nga shqetësimet si dhe ngërçi lidhur me luftën në Iran, që do të vazhdojë të pengojë furnizimin nga rajoni kryesor prodhues i naftës në Lindjen e Mesme.

Për analistët e tregjeve të huaja shqetësimi kryesor është Hormuzi. Nëse ngushtica mbetet e bllokuar ose konflikti përshkallëzohet, çmimi i naftës Platts mund të shkojë edhe deri 2 mijë USD për ton.

Tregu i naftës mbetet i përqendruar te Ngushtica e Hormuzit, përmes së cilës kalonte rreth një e pesta e furnizimit global me naftë dhe gaz natyror të lëngshëm (LNG) përpara se të fillonte lufta SHBA-Izrael kundër Iranit në fund të shkurtit.

Po ashtu rritja e Brent mbi 91 dollarë për fuçi tregon se tregtarët po llogarisin një primi më të lartë rreziku.

Ndërkohë, dërgesat e naftës nga portet perëndimore të Rusisë kanë rënë në rreth 2.3 milionë fuçi në ditë gjatë gjysmës së parë të gushtit, 15% më pak se plani fillestar i ngarkimeve, për shkak të ndërprerjeve në portin e Detit të Zi, Novorossiysk.

The post Shtrenjtohen sërish karburantet, nafta arrin 219 lekë dhe benzina mbi 2 mijë lekë për litër appeared first on Fast News Economy.

Sipas Kadastrës, përmes kësaj procedure qytetarët mund të pajisen me dokumentacionin e plotë të pronësisë për shtëpinë e tyre.

Për të nisur aplikimin, qytetari duhet fillimisht të hyjë në llogarinë e tij në portalin e-Albania.

Më pas duhet të zgjedhë shërbimin “Aplikim për regjistrimin e kalimit të pronësisë me anë të ligjit, me vendim të gjykatës, apo të një akti administrativ” dhe të klikojë opsionin “Përdor”.

Pas hapjes së shërbimit, aplikanti duhet të krijojë një aplikim të ri dhe të plotësojë fushat e nevojshme të kërkuara në portal.

Në vijim duhet të shtohet nënshërbimi “Regjistrim i kalimit të pronësisë me anë të aktit administrativ të lëshuar nga ASHK”.

Sipas njoftimit, pas zgjedhjes së këtij nënshërbimi, sistemi shton automatikisht edhe shërbimin për lëshimin e certifikatës së pronësisë, kopjen e kartelës së pasurisë së paluajtshme dhe kopjen e fragmentit të hartës kadastrale.

Pasi plotësohet aplikimi, qytetari duhet ta dërgojë atë, të shkarkojë mandatin dhe të kryejë pagesën.

Pagesa mund të realizohet online, pranë Postës Shqiptare ose në çdo bankë të nivelit të dytë.

Agjencia Shtetërore e Kadastrës u ka bërë të ditur qytetarëve se informacioni mbi dokumentacionin e nevojshëm gjatë aplikimit për shërbimet kadastrale mund të gjendet në faqen e saj të internetit, në rubrikën “Shërbime”.

The post Kadastra: Hapat si të regjistroni pronësinë e shtëpive të ndërtuara para vitit ’91 appeared first on Fast News Economy.

“Në qershor të këtij viti, norma e shfrytëzimit të dhomave në hotele arriti 41.3 %, nga 39.5 % në qershor 2025, duke shënuar një rritje me 1.8 pikë përqindje”, raporton INSTAT.

Një prirje e tillë e turizmit ka nxitur vendasit që të orientohen drejt biznesit të dhënies së shtëpive me qira ditore. Sipas të dhënave, në 6 mujorin e parë të këtij viti, fitimet e arkëtuara nga ky lloj biznesi arritën në rreth 50 milionë euro, teksa rezultojnë rreth 27.7 mijë apartamente e njësi të tjera banimi të disponueshme për t’u dhënë me qira, ose 4.2% më shumë se mesatarja e vitit 2025.

Një biznes i tillë ka rritur ndjeshëm qiratë për vendasit, ku marrja e një banese modeste brenda vijës së verdhë të Tiranës, por edhe në qytetet bregdetare është bërë e papërballueshme për pjesën më të madhe të familjeve, por edhe kategorive të vecanta, si studentët.

The post Çmimet e larta të hoteleve, shumica e turistëve zgjedhin shtëpitë me qira appeared first on Fast News Economy.

Sipas udhëzimit të ri të botuar në Fletoren Zyrtare, aplikimet për leje unike do të bëhen përmes platformës e-Albania, ndërsa Agjencisë Kombëtare të Punësimit dhe Aftësive (AKPA), do të ketë vetëm 1 ditë pune për të dhënë një përgjigje nga 2 javë (10 ditë punë) që ishte afati i mëparshëm.

“Autoriteti përgjegjës qendror/rajonal i AKPA së shprehet në sistemin elektronik online, me miratim paraprak/aprovim/kërkesë për plotësim dokumentacioni apo refuzim të kërkesës për miratim punësimi, brenda 1 (një) dite pune pas vlerësimit të aplikimit në sistemin e shërbimeve të punësimit, kontratës së punës/ofertës së punës (sipas formatit standard në shtojcën 1 dhe/ose dokumenteve të tjera të nevojshme)”, përcaktohet në udhëzimin e ri.

Udhëzimi i ri zgjeron edhe kategoritë e të huajve që përfshihen në procedurën e miratimit të punësimit, duke synuar një proces më të shpejtë dhe më të thjeshtë administrativ.

Udhëzimi i vitit 2023  përfshinte kryesisht punëmarrës, punëtorë sezonalë, ICT, të kualifikuar, vullnetarë, sportistë dhe shërbime kontraktuale.

Në udhëzimin e ri, shtohet edhe kategori të tjera, përfshirë të vetëpunësuarit, punonjësit ndërkufitarë, personat për formim profesional dhe punëtorët e shtëpisë.

Udhëzimi i ri për punësimin e të huajve

1. Bashkëpunimin ndërinstitucional ndërmjet autoriteteve shtetërore përgjegjëse që mbulojnë çështjet e kufirit dhe migracionit, dhe autoriteteve shtetërore përgjegjëse që mbulojnë çështjet e punësimit të të huajve, mbi zbatimin e procedurave të miratimit të lejes unike, për kategoritë e të huajve që kërkojnë miratim për punësim.
2. Kërkesa për pajisje me leje unike ose për ripërtëritjen e saj, bëhet nëpërmjet platformës ealbania, drejtuar drejtorisë së kufirit dhe migracionit në rajonin ku kryhet aktiviteti.
3. Për kategoritë e të huajve, punëmarrës, të vetëpunësuar, punonjës ndërkufitarë, për formim profesional, punëtorët e shtëpisë, punonjës stinorë, të transferuar brenda ndërmarrjes, punonjës me kualifikim të lartë, vullnetarë, sportistë dhe shërbime kontraktuale, kërkesa shqyrtohet fillimisht nga autoriteti përgjegjës qendror/rajonal i Agjencisë Kombëtare të Punësimit dhe Aftësive (AKPA), që mbulon territorin ku i huaji kryen aktivitetin.
4. Për shtetasit e Shteteve të Bashkuara të Amerikës dhe anëtarët e familjes së tyre, dhe shtetas të zonës Shengen, që nuk janë anëtarë të Bashkimit Evropian dhe që janë me qëndrim të ligjshëm në Republikën e Shqipërisë, shtetasit e njërit prej vendeve të Ballkanit Perëndimor, Bosnjë Hercegovinës, Malit të Zi, Kosovës, Serbisë dhe Maqedonisë së Veriut, kërkesa trajtohet vetëm nga struktura vendore e kufirit dhe migracionit, ndërsa AKPA-ja i siguron të dhënat për këtë kategori të huajsh të punësuar, nëpërmjet sistemit elektronik.
5. Autoriteti përgjegjës qendror/rajonal i AKPA së shprehet në sistemin elektronik online, me miratim paraprak/aprovim/kërkesë për plotësim dokumentacioni apo refuzim të kërkesës për miratim punësimi, brenda 1 (një) dite pune pas vlerësimit të aplikimit në sistemin e shërbimeve të punësimit, kontratës së punës/ofertës së punës (sipas formatit standard në shtojcën 1 dhe/ose dokumenteve të tjera të nevojshme).
6. Autoriteti përgjegjës qendror/rajonal i AKPAsë, miraton kërkesën për punësim nëse janë plotësuar kriteret e pikës 6, të nenit 74, të ligjit “Për të huajt”, të ndryshuar, kriteret dhe dokumentacionin sipas vendimit të Këshillit të Ministrave nr. 858, datë 29.12.2021, “Për përcaktimin e kritereve, të procedurave e të dokumentacionit për hyrjen, qëndrimin dhe trajtimin e të huajve në Republikën e Shqipërisë”, të ndryshuar, si dhe duke u bazuar në dokumentacionin e siguruar nëpërmjet konsultimit me sisteme të tjera informatike.
7. Për ripërtëritjen e lejes unike, në rastet kur kërkohet miratimi për punësim, ndiqet e njëjta procedurë si në rastin e kërkesës për miratim për punësim për herë të parë, me përjashtim të shpalljes së vendit të lirë të punës
8. Në rast se, miratimi për punësimin e një të huaji revokohet, autoriteti përgjegjës qendror/ rajonal i AKPA-së, shprehet në sistemin elektronik online për revokimin e miratimit për punësim.
9. Autoriteti përgjegjës vendor për kufirin dhe migracionin dhe autoriteti përgjegjës qendror/ rajonal i AKPA-së, shkëmbejnë informacione për rastet kur ka ndryshim të kushteve të punësimit apo kur AKPA-ja refuzon të japë miratimin për punësimin e një të huaji.
10. Verifikimi i dokumentacionit të paraqitur online për miratimin e lejes unike, bëhet nga autoriteti përgjegjës vendor për kufirin dhe migracionin.
11. Drejtori i përgjithshëm i AKPA-së përcakton personat përgjegjës për aprovimin apo refuzimin e kërkesës në strukturën qendrore/rajonale.
12. Udhëzimi i përbashkët i ministrit të Brendshëm dhe i ministrit të Financave dhe Ekonomisë nr. 3, datë 11.1.2023, “Mbi bashkëpunimin ndërinstitucional ndërmjet autoriteteve përgjegjëse të Ministrisë së Brendshme dhe autoriteteve përgjegjëse të Ministrisë së Financave dhe Ekonomisë, për përcaktimin e procedurave për miratimin e lejes unike”, shfuqizohet. 1
13. Për zbatimin e këtij udhëzimi ngarkohen Drejtoria e Përgjithshme e Policisë së Shtetit dhe Agjencia Kombëtare e Punësimit dhe Aftësive. Ky udhëzim hyn në fuqi menjëherë pas botimit në Fletoren Zyrtare./Monitor

The post Punësimi i të huajve, udhëzimi i ri shkurton në 1 ditë afatin për miratimin e kërkesave appeared first on Fast News Economy.

Teksa kanë kaluar më shumë se tre vjet nga afati i lënë në dispozicion, sa kanë arritur të përfitojnë vendet e rajonit?

Sipas Komisionit Europian në Bruksel, zbatimi I Planit të Rritjes është duke u zbatuar, por me shpejtësi të ndryshme nga shtetet përfituese. Deri më tani, janë disbursuar 673.6 milionë euro.

Më saktësisht, Shqipëria ka përfituar 212.8 milionë euro; Serbia 167.5 milionë euro; Maqedonia e Veriut 142.1 milionë euro; Mali i Zi 91.2 milionë euro dhe Kosova 61.8 milionë euro.Të dhënat tregojnë se pavarësisht se procesi vijon, vendet po përfitojnë me shtëjtësi të ndryshme, cka dëshmon edhe për ecurinë e reformëve, pa të cilat integrimi në BE do të jetë i pamundur.

FONDET E DISBURSUARA NGA PLANI I RRITJES SË BE

(Burimi: WeBalkans.eu)

Shqipëria                                        212.8 mln euro

Serbia                                             167.5 mln euro

Maqedonia e Veriut                        142.1 mln euro

Mali i Zi                                             91.2 mln euro

Kosova                                              61.8 mln euro

The post Zbardhen shifrat/ Sa kanë përfituar vendet e rajonit nga Plani i Rritjes së BE-së appeared first on Fast News Economy.

Kthimi i Shqipërisë në një destinacion turistik hapi një mundësi të re biznesi për shumë qytetarë, të cilët nisën t’i jepnin banesat me qira ditore, sidomos në Tiranë dhe në bregdet.

Për disa vite, tregu u zgjerua me shpejtësi, i nxitur nga rritja e turistëve dhe pritshmëritë për fitime të larta.

Tani po shfaqen shenjat e para të maturimit. Shtimi i ofertës ka rritur konkurrencën dhe ka mbajtur kthimet e ulëta. Në kahun tjetër, pakësimi i banesave për qira afatgjatë i ka shtrenjtuar këto të fundit, duke i bërë sërish më tërheqëse për pronarët. Rënia e Euros është një tjetër faktor që e ka bërë më pak interesante qiradhënien ditore.

Të dhënat e AirDNA, njësia analitike e platformës së qiradhënies Airbnb, të bëra të disponueshme për “Monitor”, bëjnë të ditur se në të gjithë vendin, mesatarisht për 6-mujorin e parë 2026, jepeshin me qira 27.7 mijë apartamente përmes platformës së qiradhënies, kryesisht Airbnb, nga 26.6 mijë për gjithë vitin 2025 dhe rreth 25 mijë për 6- mujorin e parë 2025 dhe 18 mijë për 6-mujorin e parë 2024.

Ndryshe nga vitet e mëparshme, kur apartamentet e listuara me qira ditore u rritën me shpejtësi, me rreth 6-7 mijë njësi që shtoheshin në vit, në muajt e parë të 2026-s po vihen re shenja të qarta ngadalësimi, me vetëm 1.1 mijë njësi më shumë.

Për krahasim, në janar të vitit 2021, kur është dhe e dhëna më e hershme e disponueshme nga AirDNA, jepeshin me qira përmes Airbnb rreth 6.2 mijë apartamente apo njësi të tjera banimi, ose 4 herë më pak sesa sot.

Shifra prej 27.7 mijë njësish që jepen me qira ditore përfaqëson gati 3% të totalit të njësive për banim në vend (rreth 1.08 milionë) sipas INSTAT, apo rreth 6% të apartamenteve në pallate (432 mijë).

Të ardhurat që gjenerohen nga net-qëndrimet e shtetasve të tretë, pjesa më e madhe e të cilëve janë të huaj, mbeten një burim i mirë për shtetasit shqiptarë, individë, apo biznese që menaxhojnë disa njësi.

Sipas të dhënave nga AirDNA, në 6 muajt e parë të vitit 2026 nga qiradhënia në Shqipëri u gjeneruan gjithsej 48.8 milionë euro, me rritje 14.4% me bazë vjetore.

Ritmet e rritjes janë ngadalësuar në krahasim me të njëjtën periudhë të një viti më parë, kur zgjerimi ishte 33.4%.

Me çmimet ditore të qirave që janë më të lira sesa të hoteleve dhe numrit më të lartë të personave që mund të qëndrojnë në një apartament, kërkesa për këto njësi akomoduese mbetet e lartë.

Sipas muajve, janari deri në prill rezultojnë se kanë qenë të dobët, të ndikuar dhe nga moti i paqëndrueshëm i ftohtë dhe me reshje.

Rikuperimi ka filluar në prill, ndërsa në qershor, arkëtimet nga qiraja ditore arritën në 18.7 milionë euro, me rritje 29% nga qershori 2025, i ndikuar nga kërkesa e lartë për net-qëndrime në Vlorë.

Në qershor 2026, në të gjithë vendin u dhanë me qira përmes Airbnb rreth 31.7 mijë njësi banimi, nga 25.7 mijë në janar. Paralelisht me zgjerimin e ofertës, u rrit edhe përdorimi i saj: në janar, njësitë ishin të zëna mesatarisht në 47% të periudhës, ndërsa në qershor, norma e zënies arriti në 59%, sipas AirDNA.

Vitet e fundit është krijuar gradualisht një nëntreg i mirëfilltë “hotelerie” jashtë strukturave klasike, i orientuar kryesisht drejt familjeve dhe të rinjve me buxhet më të kufizuar.

Ky model përputhet edhe me profilin e një pjese të madhe të turistëve që tërheq Shqipëria, të cilët kërkojnë alternativa më ekonomike, fleksibël dhe të përshtatshme për qëndrime në grup, ose për periudha më të gjata.

Ky treg u zgjerua aq shumë sa ndikoi zinxhir dhe në sektorë të tjerë, sidomos në atë të aktiviteteve për rregullimin e apartamenteve, si hidrosanitaret, apo mobiliet, sipas deklarimeve nga operatorët përkatës.

Pronarët investuan në njësitë që jepen me qira, që përgjithësisht janë të mirë modeluara, si për dizajn ashtu dhe për pajisje.

Net-qëndrimet arrijnë rekord në qershor

Kërkesa për net-qëndrime në strukturat e Airbnb nisi më dobët në muajt e parë të vitit, e ndikuar edhe nga kushtet e pafavorshme të motit, që frenuan lëvizjet turistike dhe rezervimet. Gjallërimi u bë më i dukshëm në maj dhe u përshpejtua ndjeshëm në qershor.

Në qershor 2026, kërkesa arriti në rreth 284 mijë net-qëndrime, niveli më i lartë për këtë muaj, me një rritje prej 23% krahasuar me qershorin e vitit 2025.

Kjo ecuri konfirmon hyrjen në sezonin e pikut, pasi zakonisht kërkesa për akomodim afatshkurtër rritet fort nga qershori dhe arrin nivelet më të larta gjatë periudhës qershor-shtator, e ndikuar nga zonat bregdetare, ku rolin kryesor e mban Jugu me Vlorën dhe Sarandën.

Çmimi ditor i qirave bie në janar-mars, rritet në qershor

Të dhënat e AirDNA tregojnë se çmimi mesatar ditor për një njësi banimi me qira afatshkurtër në Shqipëri u luhat nga 39.4 euro në janar në 65.8 euro në qershor.

Në muajt e parë të vitit, tarifat qëndruan në nivele të ulëta, duke zbritur edhe në 38 euro në shkurt, ndërsa në mars u rikthyen lehtë në 40.6 euro. Me nisjen e sezonit turistik, çmimet filluan të rriteshin: në prill arritën në 44.7 euro, në maj në 51.6 euro dhe në qershor, në 65.8 euro.

Ecuria e viteve të mëparshme tregon se çmimet arrijnë zakonisht kulmin në korrik dhe gusht, kur kërkesa turistike është më e lartë, duke kulmuar në 70-74 euro mesatarisht dhe më pas bien gradualisht nga shtatori deri në fund të vitit.

Ndryshe nga tregje të tjera europiane, tarifat ditore në Shqipëri nuk kanë shënuar rritje të fortë gjatë viteve të fundit. Shtimi i shpejtë i apartamenteve të listuara ka rritur konkurrencën mes pronarëve dhe ka kufizuar mundësinë për rritje të mëtejshme të çmimeve.

Sipas të dhënave nga AirDNA, çmimi mesatar i qirasë për 6-mujorin 2026 ishte 46.7 euro, në të njëjtat nivele si në 2025-n, i ndikuar nga ecuria e dobët në tre muajt e parë të vitit.

Të ardhurat reale mujore rriten lehtë në euro, por i zhvlerëson kursi

Vitet e fundit, pronarë banesash dhe individë të tjerë iu bashkuan trendit, duke rritur ndjeshëm numrin e apartamenteve të ofruara për qira afatshkurtër, të nxitur nga bindja se kjo formë qiradhënieje garanton fitime të lehta dhe të shpejta.

Një apartament mund ta japësh me qira ditore nga 40 – 80 euro, por jo i gjithë muaji është i zënë, sidomos në pjesën e parë të vitit. Për 6- mujorin e parë 2026, sipas statistikave të AirDNA, norma e zënies varion nga 47.2% në janar, në 59% në qershor.

Mesatarisht norma e zënies ditore ishte 53.7% në janar – qershor 2026, nga 53.2% në të njëjtën periudhë të një viti më parë. Kjo do të thotë se në një muaj, shtëpia është e zënë për 15 – 16 ditë, përveç muajve të verës, kur mund ta japësh edhe për më shumë se 20 ditë.

Treguesi RevPAR (të ardhura për qiranë e disponueshme), – i cili tregon të ardhurën reale ditore bazuar në arkëtimin e një muaji dhe që jep një ide më të qartë të shëndetit të tregut sesa shifrat e larta të të ardhurave totale, – në janar-qershor 2026 luhatej në 25.3 euro, nga 24.9 euro të njëjtën periudhë të një viti më parë. Treguesi ka shënuar përmirësim të lehtë, që është ndikuar kryesisht nga ecuria e mirë e qershorit.

Niveli më i ulët është në janar, me 18.6 euro në ditë, për t’u rritur gradualisht, me qershorin që jepte një fitim mesatar ditor prej gati 39 eurosh.

Me një mesatare të thjeshtë, e ardhura mujore nga qiradhënia ditore në Shqipëri për 6-mujorin e parë 2026 ishte 760 euro në muaj.

Kjo është një e ardhur bruto, pasi duhet të hiqen shpenzimet si pastrimi, energjia, amortizimi, kosto të tjera të riparimit e zëvendësimit të pajisjeve, etj., që mund të arrijnë nga 100 deri në 200 euro në muaj. Fitimi mujor luhatej nga 56 euro në janar, në 76 euro në qershor.

Një tjetër faktor që ndikon është euro. Mesatarisht, 1 euro po këmbehet me më pak se 94 lekë, nga rreth 100 lekë një vit më parë, duke zhvlerësuar tërësisht përfitimin nga rritja e lehtë e çmimeve.

Kthimi nga qiradhënia ditore

Me një mesatare të thjeshtë, e ardhura mujore nga qiradhënia ditore në Shqipëri për 6–mujorin e parë 2026 ishte 760 euro në muaj. Kjo është një e ardhur bruto, pasi duhet të hiqen shpenzimet si pastrimi, energjia, amortizimi, kosto të tjera të riparimit e zëvendësimit të pajisjeve, etj., që mund të arrijnë nga 100 deri në 200 euro në muaj. Fitimi mujor luhatej nga 56 euro në janar, në 760 euro në qershor.

Në praktikë, ky model i qiradhënies afatshkurtër funksionon më mirë për ata që e kanë kthyer në një aktivitet të mirëfilltë biznesi, duke menaxhuar disa apartamente njëkohësisht.

Shkalla më e madhe e aktivitetit u mundëson të shpërndajnë kostot e pastrimit, mirëmbajtjes, administrimit dhe marketingut në më shumë njësi, duke rritur eficiencën dhe fitimin për pronë.

Më të favorizuar janë edhe pronarët që i kanë banesat në pronësi dhe nuk paguajnë këste kredie apo qira mujore. Për ta, edhe në muajt me kërkesë më të dobët, kostot fikse mbeten më të ulëta dhe aktiviteti mund të jetë më i leverdishëm.

Në të kundërt, për ata që blejnë një apartament posaçërisht për ta dhënë me qira ditore, kthimi bëhet më i pasigurt. Çmimi i lartë i blerjes, interesat e kredisë, periudhat kur prona mbetet bosh dhe konkurrenca e madhe mund ta zgjasin ndjeshëm kohën e rikuperimit të investimit.

A ia vlen si biznes

“Model i qiradhënies afatshkurtër funksionon më mirë për ata që e kanë kthyer në një aktivitet të mirëfilltë biznesi, duke menaxhuar disa apartamente njëkohësisht. Shkalla më e madhe e aktivitetit u mundëson të shpërndajnë kostot e pastrimit, mirëmbajtjes, administrimit dhe marketingut në më shumë njësi, duke rritur eficiencën dhe fitimin për pronë.

Më të favorizuar janë edhe pronarët që i kanë banesat në pronësi dhe nuk paguajnë këste kredie apo qira mujore. Për ta, edhe në muajt me kërkesë më të dobët, kostot fikse mbeten më të ulëta dhe aktiviteti mund të jetë më i leverdishëm.

Në të kundërt, për ata që blejnë një apartament posaçërisht për ta dhënë me qira ditore, kthimi bëhet më i pasigurt. Çmimi i lartë i blerjes, interesat e kredisë, periudhat kur prona mbetet bosh dhe konkurrenca e madhe mund ta zgjasin ndjeshëm kohën e rikuperimit të investimit.”/Monitor

The post Arrijnë në 50 milionë euro fitimet nga dhënia e shtëpive me qira ditore në janar-qershor 2026 appeared first on Fast News Economy.

Ambasada e Mbretërisë së Marokut, e akredituar në Republikën e Shqipërisë, me seli në Romë, ka njoftuar Ministrinë për Evropën dhe Punët e Jashtme të Republikës së Shqipërisë se autoritetet kompetente marokene kanë vendosur heqjen e kërkesës për vizë për shtetasit e Republikës së Shqipërisë që udhëtojnë drejt Mbretërisë së Marokut për qëndrime afatshkurtra.

Ky vendim hyn në fuqi më 15 gusht 2026 dhe lidhet me angazhimin e shprehur në Deklaratën e Përbashkët të nënshkruar më 1 mars 2025, ndërmjet Ministrit të Punëve të Jashtme, Bashkëpunimit Afrikan dhe Marokenëve Jashtë Vendit të Mbretërisë së Marokut dhe homologut të tij shqiptar, Igli Hasani, i cili në atë kohë mbante detyrën e ministrit për Evropën dhe Punët e Jashtme të Republikës së Shqipërisë.

The post Maroku heq regjimin e vizave për shtetasit shqiptarë për qëndrime afatshkurtra appeared first on Fast News Economy.

Teksa vendi po përballet me emergjencën e zjarreve, për shkak të zjarrëvënieve të qëllimshme të favorizuara edhe nga temperaturat e larta , pikëpyetje ngrihen mbi përgjegjësinë dhe aftësinë e bashkive për të menaxhuar situata të tilla. Kruja, por jo vetëm, ishte një nga situatat kritike, ku shuarja e vatrave të zjarrit kërkoi angazhimin e pothuajse të gjithë strukturave të shtetit, për të shmangur fatalitete. Vitin e kaluar, kanë qenë zjarret në jug të vendit, ku ishte e domosdoshme marrja e ndihmës edhe nga vendet fqinjë, nëpërmjet aktivizimit të Mekanizmit Europian të Mbrojtjes Civile.

A mundet sistemi aktual i pushtetit vendor, me qelizë strukturat vendore bashki/prefekturë, të menaxhojnë emergjencën e zjarreve, ashtu siç është ligjërisht e parashikuar në kompetencat e tyre? A është kjo çështje thjeshtë financiare apo teknike dhe operacionale në terma të mangësive të kapitalit njerëzor?

Merita Toska, eksperte e njohur për qeverisjen dhe financat vendore shpjegon për Fast New Economy sesi është situata në bashki dhe cfarë sugjerohet për të çuar në një tjetër nivel menaxhimin e emergjencave, si dhe çfarë masash parandaluese mund të merren.

A munden bashkitë ta përballojnë situatën me zjarret, nisur edhe nga rasti i Krujës?

Në zbatim të Parimit të Subsidiaritetit të ligjit për mbrojtjen civile, bashkitë kanë një përgjegjësi të drejtpërdrejtë në mbrojtjen civile dhe janë “hallka e parë e reagimit”, megjithatë faktet flasin që asnjë  bashki e vetme apo fqinje, të përballojë me kapacitetet e veta zjarre të përmasave masive. Kjo vlen veçanërisht për zjarret në zona rurale në pyje, në kushte temperaturash të larta dhe erërash të forta, kur rreziku cënon zonat e banuara dhe kërkohet ndërhyrje nga ajri.

Rasti i Krujës e ilustron pikërisht këtë. Agjencia Kombëtare e Mbrojtjes Civile vlerësoi domosdoshmërinë e angazhimit njëherësh të strukturave të emergjencave civile të disa bashkive, shërbimit zjarrfikës, Forcave të Armatosura dhe mjeteve ajrore, pas shterrimit të kapaciteteve lokale. Pra, nuk ishte një operacion që mund të menaxhohej vetëm nga Bashkia Krujë. Kjo është një panoramë e përsëritur thuajse çdo vit për raste të ngjashme.

Ndaj dhe çështja nuk duhet shtruar thjeshtë “a ka apo jo kapacitete bashkia?”. Sistemi i mbrojtjes civile është projektuar si sistem me disa nivele: bashkia duhet të ketë kapacitet për parandalimin, gatishmërinë dhe ndërhyrjen e parë, ndërsa kur niveli i emergjencës tejkalon kapacitetet vendore, duhet të aktivizohen burimet rajonale dhe kombëtare.

Analiza e riskut dhe evidentimi i zonave prioritare në nivel bashkie, ngelet një nga mangësitë kryesore që pengojnë planifikimin e duhur operacional dhe financiar. Vizioni i munguar i autoriteteve vendore, për të qëndruar në gatishmëri dhe përgjigje emergjente efektive, shkakton jo vetëm kaos, por edhe menaxhim të cunguar të emergjencave.

Problematika kryesore është nëse bashkitë kanë kapacitete të mjaftueshme për të ushtruar detyrat që u takojnë atyre: mjete zjarrfikëse të përshtatshme, pajisje për terrene të vështira, menaxhim i fondit pyjor për rrugë aksesimi, personel të trajnuar, plane emergjence të përditësuara, dhe financim të qëndrueshëm. Këto kapacitete nuk janë të njëjta në të gjitha bashkitë.

Prandaj, për fatkeqësitë me përmasa të mëdha, modeli duhet të jetë “kapacitet vendor i fortë + mbështetje kombëtare e shpejtë”. Në gjykimin tim, pritshmëria që çdo bashki të jetë e vetëmjaftueshme në kushtet aktuale është e pamundur.

Si financohet menaxhimi i fatkeqësive natyrore?

Financimi në Shqipëri është i shpërndarë në disa nivele dhe instrumente. Ligji për mbrojtjen civile parashikon disa burime financimi si nga buxheti qendror, ashtu edhe nga buxhetet e institucioneve dhe të njësive të vetëqeverisjes vendore. Dokumentet zyrtare të financave evidentojnë fondin e emergjencave civile, buxhetet e ministrive për zvogëlimin e riskut, financimin e bashkive, fondin rezervë, fondin e kontingjencës dhe instrumente të tjera.

Për bashkitë, ligji parashikon një nivel minimal financimi për mbrojtjen civile të lidhur me 4% të buxhetit të tyre vjetor, i cili mbështetet përmes fondeve të kushtëzuara të buxhetit të shtetit. Për vitin 2026, është aplikuar edhe një ndryshim i rëndësishëm: transferta e kushtëzuar për emergjencat civile shpërndahet sipas një metodologjie që integron nivelin e riskut, treguesit financiarë dhe demografikë të territorit, duke i dhënë peshë të veçantë riskut të shumëfishtë.

Kjo është një qasje më e mirë sesa shpërndarja thjeshtë mbi bazën e madhësisë së buxhetit të bashkisë, sepse në parim financimi për fatkeqësitë duhet të ndjekë riskun: një territor më i ekspozuar ndaj zjarreve, përmbytjeve, rrëshqitjeve apo tërmeteve duhet të ketë edhe kapacitete financiare proporcionale me këtë ekspozim.

Megjithatë, është e rëndësishme të dallojmë financimin “pas fatkeqësisë”, nga financimi “para fatkeqësisë”. Një sistem i mirë nuk duhet të financojë kryesisht reagimin dhe kompensimin pasi dëmi ka ndodhur; ai duhet të investojë më shumë në parandalim, paralajmërim të hershëm,  reduktim të riskut mirëmbajtje, kapacitete operacionale – sikundër ligji për emergjencat civile dhe Strategjia Kombëtare për Zvogëlimin e Riskut nga Fatkeqësitë përcakton.

Si duhet të ndërmerren masa parandaluese për fatkeqësitë natyrore, konkretisht për riskun e zjarreve?

Në menaxhimin modern të fatkeqësive, parandalimi dhe zvogëlimi i riskut janë po aq të rëndësishëm sa reagimi. Jo çdo zjarr mund të parandalohet, por, mund të reduktohet ndjeshëm probabiliteti që një vatër e vogël të shndërrohet në një fatkeqësi të madhe.

Për zjarret në pyje kjo nënkupton menaxhim të vazhdueshëm të pyjeve dhe bimësisë, pastrim të materialit të djegshëm, krijim dhe mirëmbajtje të brezave kundër zjarrit, sigurim të rrugëve të aksesit për zjarrfikëset, pika furnizimi me ujë, monitorim të zonave me risk të lartë, sisteme të paralajmërimit të hershëm dhe reagim shumë të shpejtë ndaj vatrave të para. Po aq i rëndësishëm është kontrolli i ndërtimeve dhe zhvillimit në zonat ku pylli takohet me zonat e banuara.

Parandalimi ka edhe një komponent të fortë njerëzor. Shumë zjarre lidhen me veprimtarinë njerëzore, qoftë nga pakujdesia apo nga zjarrvënia. Prandaj nevojiten informim dhe ndërgjegjësim i publikut, kontrolle, zbatim efektiv i ligjit dhe hetim i shpejtë i rasteve.

Në aspektin financiar, ky është edhe argumenti më i rëndësishëm: duhet të shpenzojmë para përpara se të ndodhë fatkeqësia, jo vetëm pasi ajo ka ndodhur. Buxhetet e viteve të fundit e njohin këtë logjikë, pasi parashikon fonde të veçanta për projektet infrastrukturore të parandalimit të fatkeqësive natyrore.

Sa shpenzon Shqipëria për emergjencat civile?

Këtu duhet bërë një sqarim. Nuk mund të jepet një shifër e vetme e izoluar në termin “shpenzime për fatkeqësitë”, sepse financimi është i shpërndarë në disa institucione dhe nivele të qeverisjes.

Nëse marrim vetëm programin buxhetor “Emergjencat civile” të Ministrisë së Mbrojtjes, pas ndryshimeve të buxhetit të miratuara më 30 qershor 2026, ai arrin në rreth 5.79 miliardë lekë afërsisht. Kjo përfshin rreth 1.26 miliardë lekë shpenzime korrente dhe rreth 4.53 miliardë lekë shpenzime kapitale, nga të cilat rreth 2.01 miliardë lekë financim i huaj.

Në buxhetin fillestar të vitit 2026 ishin identifikuar në mënyrë specifike edhe:

• 1 miliard lekë transfertë e kushtëzuar për emergjencat civile për bashkitë;

• 1.5 miliardë lekë për projekte që lidhen me parandalimin e fatkeqësive natyrore; dhe

• 300 milionë lekë për projekte për digat dhe rezervuarët.

Pra, vetëm këto tre instrumente përfaqësonin 2.8 miliardë lekë të dedikuara drejtpërdrejt për financimin vendor dhe investimet parandaluese.

Por kjo ende nuk përfaqëson gjithë financimin kombëtar të riskut nga fatkeqësitë. Shpenzime të lidhura me reduktimin e riskut gjenden edhe në buxhetet e ministrive të tjera, të bashkive, në infrastrukturë, pyje, kullim, diga, fondin rezervë dhe në projekte të financuara nga partnerët ndërkombëtarë.

Aktualisht, nuk mund të gjurmojmë në buxhet dhe të dhëna faktike sa është shpenzuar.

Mungesa e një mekanizmi që mat jo vetëm burimet e financimit, por edhe komponentët e zbatuar sipas llojit të rrezikut, natyrës së shpenzimit, fazës së ciklit të menaxhimit të rriskut, e vështirëson nxjerrjen e një informacioni të plotë.

Prandaj, pyetja që duhet të shtrojmë nuk është vetëm “sa para shpenzojmë?”, por edhe “sa prej tyre shkojnë për parandalim, sa për reagim emergjent, sa për rehabilitim, nëse shpërndahen aty ku risku është më i lartë dhe çfarë rezultatesh ato prodhojnë?”. Për menaxhimin e zjarreve dhe fatkeqësive në përgjithësi, pikërisht ky është treguesi më i rëndësishëm i efektivitetit të financimit publik.

The post Emergjenca nga zjarret, ekspertja: Të rishikohet roli i bashkive appeared first on Fast News Economy.

Projektligji përcakton se çdo subjekt tregtar me status aktiv në Regjistrin Tregtar, në momentin e hyrjes në fuqi të ligjit, bëhet anëtar i Dhomës “ipso lege”, pra automatikisht. E njëjta gjë do të vlejë edhe për subjektet e reja që regjistrohen apo aktivizohen në Regjistrin Tregtar, pas hyrjes në fuqi të ligjit.

Nga anëtarësimi i detyrueshëm përjashtohen subjektet që kanë detyrim të regjistrohen ose anëtarësohen në dhoma, urdhra profesionalë apo organizime të tjera të krijuara me ligj të posaçëm. “Anëtarësimi në Dhomën Ekonomike Kombëtare “ipso lege”, nuk zbatohet për subjektet tregtare që janë të detyruara të regjistrohen ose të anëtarësohen në dhoma, urdhra profesionalë, organizata profesionistesh, shoqata biznesit, dhoma bilaterale ose multilaterale biznesi të krijuar me ligj të posaçëm”, thuhet në projekligj.

Anëtarësimi do të shoqërohet me një tarifë vjetore regjistrimi, e cila do të bëhet e detyrueshme pas përfundimit të periudhës tranzitore të parashikuar në ligj.

Për subjektet që nuk janë tatimpaguese të tatimit mbi fitimin, tarifa do të jetë 1,000 lekë në vit. Për bizneset e tjera, tarifa do të miratohet nga Asambleja e Përgjithshme e Dhomës Ekonomike Kombëtare, në varësi të formës ligjore, madhësisë së ndërmarrjes, numrit të punonjësve dhe xhiros vjetore, por në çdo rast nuk do të mund të kalojë 70 mijë lekë në vit.

Për subjektet që regjistrohen për herë të parë në Regjistrin Tregtar, tarifa e vitit të parë do të jetë 1,000 lekë. Pas vitit të parë, ato do t’i nënshtrohen regjimit të përgjithshëm të tarifave.

“Periudha tranzitore” përkufizohet tashmë si periudha nga hyrja në fuqi e ligjit deri në përfundimin e mandateve të organeve ekzistuese të zgjedhura sipas ligjit aktual për Dhomat e Tregtisë dhe Industrisë. Gjatë kësaj periudhe, subjektet tregtare do të kenë statusin e anëtarit dhe do të gëzojnë të drejtat dhe detyrimet që rrjedhin nga anëtarësia, por nuk do të jenë të detyruara të paguajnë tarifën vjetore të regjistrimit.

Tarifa do të paguhet nëpërmjet sistemit bankar, jo më vonë se 30 prill i vitit pasardhës, ndërsa procedurat e mbledhjes dhe derdhjes së saj do të përcaktohen me akt nënligjor të Këshillit të Ministrave.

Mosshlyerja e tarifës do të përbëjë kundërvajtje administrative dhe do të dënohet me gjobë, masa e së cilës do të përcaktohet me akt nënligjor.

Dhoma Ekonomike Kombëtare parashikohet të funksionojë si person juridik i së drejtës publike dhe të ketë një rol më të gjerë sesa dhomat aktuale të tregtisë. Ajo do të përfaqësojë interesat e sipërmarrjes, do të koordinojë dhomat sektoriale dhe do të ushtrojë edhe funksione publike të deleguara. Ndër të tjera, Dhoma do të ketë rol në identifikimin, verifikimin dhe përditësimin e kodeve NVE të bizneseve, do të ofrojë mbështetje për procedurat e regjistrimit në QKB, do të lëshojë certifikata origjine, “Carnet ATA” dhe “Carnet TIR”, si dhe do të kryejë analiza dhe studime ekonomike. Projektligji parashikon gjithashtu që Dhoma Ekonomike Kombëtare të ketë akses në Regjistrin Tregtar, Regjistrin e Lejeve, Licencave dhe Autorizimeve, për ushtrimin e funksioneve të saj publike dhe shkëmbimin e të dhënave me Qendrën Kombëtare të Biznesit.

The post Bizneset do të regjistrohen në Dhomën Ekonomike Kombëtare, ja rregullat e reja dhe tarifat appeared first on Fast News Economy.