Sipas Analizës së Bilancit të Pagesave, në tremujorin e dytë të këtij viti, rëmitancat arritën në 274.3 milionë euro. Norma vjetore e rritjes së remitancave u ngadalësua lehtë në 9.4%, nga 10.8% në tremujorin paraardhës, megjithatë qëndron mbi normën mesatare 7.0% të vitit 2025.

Në raport me PBB-në, remitancat u rritën lehtësisht në 4.3%, nga 4.2% në tremujorin e parë të vitit 2025, duke vijuar të mbështesin rritjen e të ardhurave të disponueshme të familjeve dhe konsumin privat në vend.

“Normat vjetore të rritjes së remitancave janë përshpejtuar që prej tremujorit të katërt të vitit 2025, periudhë kjo që përkon me fillimin e operimit të sistemit “SEPA” në Shqipëri. Ky zhvillim sugjeron se reduktimi i kostove dhe rritja e eficiencës së transfertave ndërkufitare në Euro mund të kenë kontribuuar në rritjen e flukseve hyrëse të remitancave”, theksohet në analizën e Bankës së Shqipërisë.

Që prej tetorit të vitit të kaluar, kur Shqipëria hyri në SEPA, pagesat hyrëse nga emigrantët (remitanca) kushtojnë maksimumi 3 euro. Ulja e ndjeshme e kostove ka bërë që shumë emigrantë të zgjedhin rrugën zyrtare dhe tranfertat bankare për të dërguar paratë pranë të afërmve dhe jo më dërgimin e parave cash.

Cfarë është SEPA?

Zona Unike e Pagesave në Euro (SEPA) është një shtrirje gjeografike prej 41 shtetesh, një ndër të cilat edhe Shqipëria.

Të gjitha vendet anëtare të SEPA-s janë të detyruara të kryejnë dhe pranojnë pagesa në monedhën Euro për të gjithë, individë, biznese dhe institucione, brenda dhe midis vendeve anëtare të SEPA-s, me të njëjtat kushte, rregulla dhe procedura si për pagesat kombëtare në Euro.

Nën drejtimin e Bankës së Shqipërisë dhe mbështetjen e Bankës Botërore, Shqipëria u anëtarësua në SEPA në vitin 2024, pas një procesi të gjerë harmonizimi rregullator, përditësimi të infrastrukturës, testimesh teknike dhe vendimmarrjes për uljen e komisioneve bankare për pagesat në Euro.

Prej 7 tetorit 2025, një transfertë elektronike në Euro nga Tirana në Bruksel përpunohet dhe kushton njësoj si një pagesë në Euro nga Tirana në Korçë.

The post Hyrja në SEPA nxit emitancat, BSH: Ulja e kostove ka rritur dërgesat e emigrantëve appeared first on Fast News Economy.

Mund të tingëllojë shumë banale por nëse qartësohet qëllimi se pse dëshirojmë të mësojmë gjuhën e huaj nuk humbet motivimi juaj. Nëse nuk qartësohet qëllimi, atëherë bie motivimi dhe nuk do të jeni në gjendje të mësoni gjuhën.

2.Rreziko!

Pasi të qartësohet qëllimi, atëherë duhet të vetëdijesoheni që ta përdorni gjuhën e re në jetën e përditshme. Përpiquni të mendoni në gjuhën e re, kuptohet ato fjalë që i dini. Si për shembull, në vend që t’i numëroni paratë gjatë bërjes së ndonjë pagese në gjuhën shqipe, numëroni ato në gjuhën të cilën dëshironi ta mësoni.

3.Gjeje një partner

Të gjeturit një mik për të mësuar një gjuhë të re nxit motivimin tuaj edhë më tepër dhe do të keni me kë të bisedoni në gjuhën që e mësoni. Mos e merrni mikun/miken tuaj me vete që ta mësoni bashkë gjuhën, sepse shumë shpejtë do ta gjeni vetën duke biseduar për vetura ose veshje. Bëhu mik/mike me dikë që njofton në kursin e gjuhës, do të keni interesin e njëjtë, dhe mundësia për të kaluar në tema tjera është shumë e vogël. Një përparësi e kësaj është se mund t’i bëni së bashku detyrat ose te përsërisni diçka të mësuar më parë. Mund të lindë një ndjenjë e të qenët konkurent dhe kjo do të ju nxis edhe më tepër të angazhoheni.

4.Mos e humb vetën

Gjatë të mësuarit të ndonjë gjuhe mund të humbisni vetën në plot libra. Gjithnjë rikujtoni se pse e mësoni gjuhën. Në rast se dëshironi të bëni vetëm një komunikim të thjeshtë, atëherë nuk keni nevojë të merrni ndonjë libër nga astronomia në atë gjuhë.

5.Zbavitu!

Shkruaj ndonjë poezi, incizo një këngë, shkruaj një tregim, mbaje një fjalim – por në gjuhën që dëshiron të mësosh!

6.Qëndro si fëmijë

Mos mendoni tani që të filloni të qani në mes të rrugës. Nga fëmijët presim që të bëjnë gabime, ndërsa te të rriturit është diçka tabu sepse ato tashmë i kanë mësuar gjërat. Edhe ju duhet të pajtoheni me faktin se nuk mund ta mësoni një gjuhë pa gabuar. Nga gabimet do të mësoni edhe më tepër.

7.Dëgjo!

Nëse dëshirojmë të pikturojmë diçka të bukur, duhët së pari ta shikojmë objektin mirë para se të fillojmë të pikturojmë. Njësoj është te gjuha: dëgjoni fjalët njëherë me vëmendje para se ti thoni. Sa më tepër dëgjoni në gjuhën e huaj, aq më shpejtë do ta mësoni atë. Tani a do të dëgjoni muzika ose të shikoni seriale në gjuhën e huaj iu ngelët juve ta vendosni.

8.Vëzhgo të tjerët

Vëzhgimi i të tjerëve se si mundohen të flasin apo të shkruajnë në gjuhën e huaj ju ndihmon juve që të evitohen disa gabime, por edhe mund të motivoheni edhe më tepër.

9.Bisedo me vetën

Mos e bëni këtë në publik, sepse do të mendojnë të tjerët se jeni çmendur. Kur të jeni vetëm bëni dialogje me vetën, si p.sh dialogje në ndonjë lokal, dialogje në mjek, në qendër tregtare etj. Kjo ju ndihmon që ta hiqni turpin për të biseduar në gjuhën e huaj.

10.Relaksohu!

Nëse shikojmë dikë duke komunikuar në një gjuhë të huaj duke i shtrënguar dhëmbët dhe trupin, atëherë ai person duket sikur të jetë tejet i vrazhdë por edhe fjalët që i ka mësuar me orë të tëra mezi kuptohen. Lirojeni vetën, qetësohuni dhe shqiptoni fjalët me të gjitha lëvizjet e gojës pa i shtrënguar dhëmbët. Mos qëndroni asnjëherë duarkryq, sepse kjo pozitë ndihmon faktin për t’u shfaqur i vrazhdë.

The post 10 këshilla për të mësuar një gjuhë të huaj appeared first on Fast News Economy.

Wi-Fi 7 është gjenerata më e avancuar e teknologjisë wireless, e ndërtuar për t’ju përshtatur mënyrës se si përdorim internetin sot. Ai mund të përballojë shumë pajisje të lidhura njëkohësisht, të ofrojë shpejtësi më të lartë dhe një lidhje më të qëndrueshme.

Çfarë do të thotë kjo në jetën e përditshme? Filma me cilësi të lartë, telefonata me video pa shkëputje, lojëra online me reagim më të shpejtë dhe një eksperiencë më të mirë edhe kur shumë pajisje përdorin internetin në të njëjtën kohë.

Avantazhi i Wi-Fi 7 nuk qëndron vetëm te shpejtësia. Teknologjia përdor në mënyrë më efikase kapacitetin e rrjetit, duke u dhënë pajisjeve të lidhura mundësinë të komunikojnë më mirë dhe të ruajnë një lidhje të qëndrueshme në të gjithë shtëpinë. Një profesionist mund të zhvillojë një videokonferencë, ndërsa pjesëtarët e tjerë të familjes vazhdojnë të përdorin internetin. Një biznes mund të lidhë më shumë pajisje në të njëjtin rrjet. Kamerat, sistemet inteligjente dhe pajisjet e tjera mund të funksionojnë paralelisht, pa ndikuar eksperiencën e asnjë përdoruesi.

Një nga risitë e gjeneratës më të re të lidhjes wireless është aftësia për të përdorur në mënyrë më inteligjente lidhjet e disponueshme Wi-Fi. Në vend që pajisja të mbështetet vetëm te një mundësi lidhjeje, Wi-Fi 7 mund ta shpërndajë ‘trafikun’ e rrjetit në mënyrë më efikase, duke ndihmuar që lidhja të mbetet e shpejtë dhe e qëndrueshme.

Në shtëpitë shqiptare, përherë gjendet vend për një karrige më shumë. Me Wi-Fi 7 dhe One Ultra Fiber 2.5 Gbps, One Albania sjell një lidhje të menduar për shtëpitë ku gjithmonë ka lëvizje, njerëz që hyjnë e dalin dhe, shpesh, një vizitor më shumë nga sa ishte planifikuar. Sepse me Wi-Fi 7 të gjithë të qëndrojnë të lidhur, edhe kur shtëpia është plot.

The post One Albania sjell inovacionin Wi-Fi 7 për internetin në shtëpi appeared first on Fast News Economy.

Konfirmimi i vlerësimit “Ba3” pasqyron performancën solide të rritjes ekonomike, nivelet e moderuara të borxhit publik, qëndrueshmërinë e ekonomisë ndaj një sërë goditjesh gjatë viteve të fundit, si dhe pritshmërinë se rritja do të mbetet solide në periudhën afatmesme. Moody’s parashikon rritje reale të PBB-së prej 3.6% në vitin 2026 dhe 3.5% në vitin 2027, duke theksuar se ekonomia shqiptare ka dëshmuar deri tani qëndrueshmëri ndaj efekteve të konfliktit në Lindjen e Mesme, falë mbështetjes pothuajse tërësore tek energjia rinovueshme.

Agjencia thekson se autoritetet kanë dëshmuar vazhdimisht disiplinë fiskale dhe se financat publike janë forcuar progresivisht. Shqipëria ka regjistruar suficite primare në secilin nga tre vitet e fundit, pas vendosjes së rregullit fiskal që kërkon ruajtjen e një bilanci primar jo negativ. Deficiti fiskal në vitin 2025 rezultoi 1.8% e PBB-së, më i ulët se niveli i buxhetuar, ndër të tjera falë performancës solide të të ardhurave.

Moody’s parashikon që, falë rritjes ekonomike të fortë dhe deficiteve të kontrolluara fiskale, borxhi i qeverisjes së përgjithshme të vazhdojë të ulet gradualisht, në 50.2% të PBB-së në vitin 2027, nga 52.9% në fund të vitit 2025. Ky përmirësim mbështetet nga reformat fiskale, përfshirë zbatimin e Strategjisë Afatmesme të të Ardhurave në vitin 2025, përmirësimet në menaxhimin e investimeve publike dhe respektimin e rregullave fiskale, të cilat kërkojnë uljen e borxhit derisa ai të arrijë në 45% të PBB-së. Agjencia thekson gjithashtu se rreziqet e likuiditetit të qeverisë zbuten nga aksesi në financime nga BE-ja dhe institucionet financiare ndërkombëtare, menaxhimi proaktiv i borxhit dhe baza e qëndrueshme e financimit të brendshëm.

Pozicioni i jashtëm i Shqipërisë u forcua ndjeshëm në vitin 2025, me deficitin e llogarisë korente që u ngushtua në nivelin më të ulët historik prej 0.7% të PBB-së, nga 2.4% në vitin 2024, falë një deficiti më të vogël në tregtinë e mallrave dhe një suficiti më të lartë në shërbime, që pasqyron rritjen e fuqishme të eksporteve të lidhura me turizmin. Kjo prirje ka vazhduar edhe në vitin 2026, pavarësisht goditjes së çmimeve të energjisë si pasojë e konfliktit në Lindjen e Mesme, dhe Moody’s pret që deficiti i llogarisë korente të mbetet i ulët, mesatarisht rreth 1% e PBB-së në vitet 2026–2027.

Prurjet neto të investimeve të huaja direkte mbetën të konsiderueshme, rreth 5% e PBB-së në vitin 2025 dhe në tremujorin e parë të vitit 2026, duke vazhduar ta financojnë plotësisht, madje ta mbi-financojnë, deficitin e llogarisë korente. Rezervat valutore janë rritur në mënyrë progresive, duke arritur në rreth 7.9 miliardë euro në qershor 2026, nivel që mbulon dukshëm më shumë se shtatë muaj importe dhe përbën një mbrojtje të rëndësishme ndaj goditjeve të jashtme.

Moody’s vëren se që nga hapja e negociatave të anëtarësimit në vitin 2022, Shqipëria ka krijuar një dinamikë të rëndësishme reformash. Në maj 2026, vendi shënoi një moment kyç, kur BE-ja vlerësoi se Shqipëria kishte përmbushur piketat e ndërmjetme të Grupkapitullit “Themeloret”, që mbulon institucionet demokratike, reformën e administratës publike, sundimin e ligjit dhe kriteret ekonomike. Ky zhvillim i mundëson Shqipërisë të fillojë mbylljen e kapitujve negociues.

Shqipëria do të vazhdojë të përfitojë nga financimet e BE-së, si përmes instrumenteve të paraanëtarësimit, ashtu edhe përmes Planit të Ri të Rritjes për Ballkanin Perëndimor, në kuadër të të cilit alokimi indikativ për Shqipërinë arrin në 922.1 milionë euro. Agjencia vlerëson se progresi i vazhdueshëm i reformave, i mbështetur nga këto financime, ka potencialin të forcojë më tej profilin institucional dhe të qeverisjes së vendit.

Ky përmirësim i përspektivës nga Moody’s dhe ri-konfirmim i vlerësimit është një tregues mjaft i rëndësishëm i stabilitetit makroekonomik të Shqipërisë dhe progresit të vazhdueshëm në reformat strukturore, duke dhënë një sinjal pozitiv për investitorët ndërkombëtarë dhe duke mbështetur objektivat afatgjata të integrimit evropian të vendit.

The post Moody’s rrit vlerësimin për Shqipërinë, përmirëson perspektivën në “pozitive” appeared first on Fast News Economy.

Çmimet e caktuara nga Bordi do të hynë në fuqi sot datë 19 ora 16.00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.

NJOFTIMI I PLOTË I BORDIT TË TRANSPARENCËS

Bordi i Transaparencës dhe Kufizimit të Përkohshëm të çmimeve të tregtimit me shumicë/pakicë të nënprodukteve të naftës dhe të gazit, në mbështetje të Vendimit të Këshillit të Ministrave nr. 711, datë 16.09.2026 “Për shpalljen e situatës së veçantë në tregun e hidrokarbureve”, në zbatim të nenit 21/3 dhe nenit 21/5 të Ligjit 8450, datë 24.2.1999 “Për përpunimin, transportimin dhe tregtimin e naftës, të gazit dhe nënprodukteve të tyre”, të ndryshuar, si dhe të Aktit Normativ nr. 1, Datë 3.4.2026 “Për një shtesë në ligjin nr. 61/2012, “Për akcizat në Republikën e Shqipërisë,” të ndryshuar, zhvilloi mbledhjen e parë.
Kështu Bordi i Transparencës në datë 19 Shtator 2026, vendosi:
Çmimi i shitjes me pakicë i nënproduktit gazoil i standardit SSH EN 590 të jetë jo më shumë se 219 lekë/litri, ndërsa i shitjes me shumicë jo më shumë se 207 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 195 lekë/litri, ndërsa i shitjes me shumicë jo më shumë se 183 lekë/litër.
Çmimet e caktuara nga Bordi do të hynë në fuqi sot datë 19 ora 16.00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.

Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtij vendimi.
Në rast të shkeljeve të konstatuara nga operatorë të ndryshëm do të vendoset pezullimi i aktivitetit.
Ministria e Ekonomisë dhe Inovacionit sëbashku me Ministrinë e Financave dhe Ministrinë e Infrastrukturës dhe Energjisë janë angazhuar të mbrojnë interesat e konsumatorëve shqiptarë dhe ruajtjes së parimeve të konkurrencës së ndershme në treg.

The post Bordi vendos për çmimet, ja sa do të shiten nafta dhe benzina appeared first on Fast News Economy.

Sipas INSTAT-it, në gusht shkëmbimet tregtare me vendet e BE-së arritën në 46,2 %, të gjithë tregtisë. Ndërsa në të njëjtën periudhë të një viti më parë ato vlerësoheshin në 48.4% të totalit të tregtisë. Në Gusht 2026, eksportet drejt vendeve të BE-së zënë 63,1 % të eksporteve gjithsej dhe importet nga vendet e BE-së zënë 41,6 %, të importeve gjithsej.

Të dhënat e detajuara tregojnë se në këtë periudhë, vendet me të cilat Shqipëria ka pasur rritjen më të madhe të eksporteve, në krahasim me gushtin 2025 janë: Italia (5,0 %), Kosova (1,5 %), etj. Ndërsa vendet me të cilat eksportet kanë pasur rënien më të madhe, janë: Turqia (54,1 %), Maqedonia e Veriut (5,6 %), etj. Në muajin Gusht 2026, vendet me të cilat Shqipëria ka pasur rritjen më të madhe të importeve, në krahasim me Gusht 2025 janë: Italia (2,2 %), Kina (16,9 %), etj. Ndërsa vendet me të cilat importet kanë pasur rënien më të madhe, janë: Greqia (3,4 %), Gjermania (3,6 %), etj.

The post Tkurren shkëmbimet tregtare me BE-në, rriten importet nga Kina appeared first on Fast News Economy.

Në të njëjtën kohë, kompania pritet të hapë rreth 60 pozita të reja, kryesisht në sektorët e abonimeve dhe prodhimit të videove me format të gjatë. Rreth 65 vende pune pritet të reduktohen edhe në sektorin komercial.

Sipas “The Independent”, drejtori i përmbajtjes në Reach, David Higgerson, u ka bërë të ditur punonjësve se kompania po përballet me rënie të trafikut nga kërkimet në Google, si dhe me konkurrencë në rritje nga BBC. Në kuadër të ristrukturimit, Reach do të mbyllë edhe tre platforma rajonale lajmesh: KentLive, AberdeenLive dhe GalwayBeo.

Masat do të prekin punonjës në gazetat e shtypura, platformat digjitale dhe sektorin e videove. Kompania pritet të nisë një proces konsultimi me stafin, i cili do të zgjasë të paktën 45 ditë. Reach është një prej grupeve më të mëdha komerciale të medias në Britani dhe zotëron, përveç “Daily Mirror” dhe “Daily Express”, edhe “Daily Star”, “Manchester Evening News” dhe “Liverpool Echo”. Ristrukturimi vjen në një kohë kur mediat tradicionale po përballen me rënie të lexueshmërisë së gazetave të printuara dhe ndryshime në mënyrën se si audienca konsumon lajmet online. Një faktor tjetër është përhapja e përmbledhjeve të lajmeve të krijuara nga inteligjenca artificiale, të cilat mund të ulin nevojën e përdoruesve për të vizituar drejtpërdrejt faqet e mediave.

theguardian, Business Mag

The post Tregu i medias shkurton ndjeshëm vendet e punës, shkak Inteligjenca Artificiale! appeared first on Fast News Economy.

AllWeb mbledh në një ditë të vetme drejtues biznesi, marketerë, sipërmarrës dhe disa nga mendjet më interesante të fushës së marketingut digjital, inovacionit dhe teknologjisë. Tema qendrore e këtij viti është e paevitueshme: Inteligjenca Artificiale po ndryshon mënyrën se si funksionojnë bizneset, dhe pyetja që po shtrohet kudo është se çfarë duhet të bëjnë kompanitë tani, në këtë moment transformimi.

Nga lidershipi dhe besimi te marka, te marketingu, kreativiteti dhe krijimi i përmbajtjes, konferenca do të sjellë në skenë zëra nga Evropa dhe rajoni për të diskutuar se çfarë po ndryshon realisht në biznes dhe si mund të përgatiten kompanitë për të ardhmen.

Deri më tani janë konfirmuar disa emra të njohur, si Todd Rowe, ish-ekzekutiv i Google, Apple, Adobe dhe SAP, i cili ndërtoi në Google një njësi biznesi që u rrit nga 250 milionë në 8 miliardë dollarë; Kremena Yordanova, Fractional CMO e mëparshme te adidas dhe Reebok, që do të flasë për të ardhmen e besimit në epokën e AI; Ivan Minić, themelues i Burek.com dhe i podcast-it Pojačalo, një prej zërave kryesorë të sipërmarrjes digjitale në Ballkan; dhe Dr. Péter Szántó, Chief Production Officer te reel8 dhe i nderuar nga Forbes në listën “30 Under 30”, i cili do të diskutojë se si AI po transformon krijimin e përmbajtjes.

Lisa Hogg, strategji e udhëhequr nga qëllimi!

Lisa Hogg është folësja e rradhës e konfirmuar e konferencës, themeluese e BRAVE Amsterdam, një kompani konsulence strategjie e fokusuar te rritja e brandeve, në kryqëzimin e strategjisë, qëndrueshmërisë, kulturës dhe kreativitetit. Me mbi 20 vjet përvojë ndërkombëtare në lidershipin e markave dhe marketingut, Lisa ka drejtuar strategji globale brandi, marketing të integruar dhe iniciativa qëndrueshmërie pranë disa prej kompanive më të njohura në botë. Përvoja e saj, si në anën e agjencive ashtu edhe në atë të klientëve, i mundëson të lidhë ambicien komerciale me përsosmërinë krijuese, duke ndihmuar organizatat të mendojnë ndryshe dhe të ndërtojnë marka që kanë vërtet rëndësi.

Boban Ilik, inxhinieria e marketingut dhe AI-së!

Folësi tjetër është Boban Ilik, Marketing Engineer dhe Outreach Manager pranë Flow Agency, një agjenci marketingu B2B e specializuar për startup-e SaaS dhe shërbime profesionale. Me pothuajse 10 vjet përvojë në fushën e SEO-s, Boban drejton operacionet e link-building dhe ndërton mjete të brendshme që automatizojnë proceset e marketingut. Punët e tij më të fundit përfshijnë workflow-e të fuqizuara nga AI për analizën e konkurrentëve dhe auditimin e publikimeve, si dhe migrime të plota websitesh drejt platformave moderne. Ai flet rregullisht në konferenca ndërkombëtare për tema si link building, dukshmëria në motorët e kërkimit të fuqizuar nga AI, dhe rolin në zhvillim të “Marketing Engineering” në agjencitë bashkëkohore. Prezantimin e tij të fundit e mbajti në shtator në konferencën SaaS SEO Alliance në Indi, ndërsa i radhës do të jetë pikërisht në Tiranë, në AllWeb 2026./Business Mag

Ju mund të blini tani biletat tuaja me çmimin Early Bird deri më 30 shtator.
6 Nëntor · Tiranë
allweb.digital

The post AllWeb prezanton dy folës të rinj, Lisa Hogg dhe Boban Ilik i bashkohen konferencës! appeared first on Fast News Economy.

Rama u bëri thirrje rrjeteve të supermarketeve që të angazhohen në një fazë pilot për transmetimin e të dhënave, duke propozuar që lista e produkteve të përfshijë barkodin, gramaturën dhe njësinë matëse, në mënyrë që produktet të jenë të krahasueshme mes rrjeteve.

Kryeministri theksoi se platforma duhet të pasqyrojë çmimin final për konsumatorin, përfshirë TVSH-në, si dhe të bëjë dallimin mes çmimit normal dhe atij promocional.

“Unë besoj se ju jeni të vetëdijshëm se po fitoni më shumë nga ç’e mban zakoni i mirë në një bashkësi si e jona që s’është as Kina, as Amerika, dhe ku ky kapitalizmi agresiv ka filluar të bëhet shqetësues për të gjithë. Të angazhohemi bashkërisht, konkretisht, që të rrjeti i pikave tuaja të shitjes të marrin pjesë në një fazë pilot dhe të nis transmetimi i të dhënave. Të dorëzohet lista e produkteve që përputhet me kategorinë e kësaj faze, me barkod, me gramaturë, me njësi matëse, në mënyrë që të produktet të jenë të krahasueshme mes gjithë rrjeteve.

Platforma për të marrë çmimin real final për konsumatorin, me TVSH, dhe të dallojë çmimin normal nga promocioni dhe periudha e vlefshmërisë. Qytetari të shikojë, të krahasojë, edhe të zgjedhë, jo të jetë në errësirë dhe të përballet me çfarë i sjell rruga në errësirë, dhe mos ketë një pasqyrë konkurrence, ku më i shkathëti dhe më i shpejti të fitojë më shumë. Askush s’po ju thotë që ne të përcaktojmë çmimet se do ishte marrëzi. Askush s’po ju thotë të mos nxirrni fitime. Por ka ardhur një moment që ta shohim njëri-tjetrin në sy. Por që të ngarkoni njerëzit ne s’do t’ua lejojmë, do jetë problem i madh, do thoni çfarë i hapëm vetes, në djall ato që po i fitojmë pa të drejtë”, deklaroi Rama.

Ministrja Ibrahimaj: Do analizojmë çmimet, forcimi i lekut duhej të sillte ulje

Gjatë takimit me rrjetin e supermarketeve dhe furnitorët kryesorë, ministrja e Ekonomisë dhe Inovacionit, Delina Ibrahimaj u ndal tek niveli i çmimi të produkteve ushqimore. Sipas saj, zhvlerësimi i euros duhet të kishte ndikuar tek ulja e çmimeve të shportës ushqimore për mallrat e importit.

“Ne nuk kemi në dorë të ndikojmë tregun ndërkombëtar, por ne kemi në dorë që të bëjmë transparencë për qytetarët dhe kjo është ajo që duam të bëjmë. Ndërkohë që, përveç transparencës, është e rëndësishme që ne bashkërisht të kuptojmë se çfarë ndodh me çmimet. Kush është hallka e zinxhirit që sjell rritjen e këtyre çmimeve?

Në vitet e fundit, ne të gjithë bashkë kemi parë, kemi diskutuar dukuri të cilat duhet të kishin ndikuar në reduktimin e çmimeve. Për shembull, nënvlerësimi i euros, mbivlerësimi i lekut, pra forcimi i lekut duhet të kishte ndikuar domosdoshmërisht në një reduktim të çmimeve, duke qenë se minimalisht 40% e produkteve të shportës importohen.

Që do të thotë që për ne, për konsumatorët shqiptarë, nga momenti që leku është më i fortë, ato produkte duhet të jenë pak më të lira. Sigurisht që besoj që ka arsye pse kjo nuk ka ndodhur, por për ta kuptuar më mirë këtë dukuri, ne duhet të kuptojmë se çfarë ndodh, ku dhe pse çmimet vazhdojnë të rriten në vend.

Çfarë ndodh kur duhet të ulen për shkak të forcimit të lekut, për shkak të zhvillimeve pozitive në ekonominë shqiptare? Pse këto zhvillime pozitive nuk transferohen te konsumatorët?

Unë, për analizë, iu referova raportit të fundit të Bankës së Shqipërisë, i cili tregon se inflacioni i importuar në gjashtëmujorin e parë të vitit ka qenë në rënie, që do të thotë që janë produktet vendase që janë më të shtrenjta. Po pse janë ato më të shtrenjta? Kush është hallka e zinxhirit që i rrit ato?

Ky është dhe qëllimi i gjithë nismës që ne e kemi ndërmarrë për të bërë transparencë, analizë dhe monitorim:”, u shpreh ministrja.

Ibrahimaj shpjegoi se i është kërkuar rrjetit të supermarketeve kryesore që të vinin në dispozicion një listë me produktet që janë më të shitura, të cilat përfshijnë produkte ushqimore të shportës, por edhe produkte të higjienës, që konsumatorët shqiptarë përdorin më shumë. U kërkua një alternativë të çmimeve të produkteve që prodhohen në vend dhe një alternativë të produkteve që importohen, me qëllim që të dyja kategoritë e produkteve të bëheshibn transparente dhe të analizoheshin.

“U la kohë e mjaftueshme. Unë jam e bindur që të gjitha supermarketet e kanë mundësinë për ta nxjerrë këtë listë me produktet më të shitura për një orë. U lanë këto dy javë dhe vetëm një nga rrjetet e supermarketeve ktheu përgjigje për këtë listë, ndërkohë që në tryezë ishin dakord, sepse është një nismë që është pozitive, që stimulon konkurrencën”, deklaroi Ibrahimaj.

Ajo shtoi se u bënë përpjekje për të ulur cmimet e disa produkteve ushqimore në bashkëpunim me biznesin, si në rastin e Greqisë dhe sërish nuk pati reagim nga supermarketet.

“Është një nismë që nuk bëhet në Shqipëri për herë të parë. Është bërë në Greqi, është bërë në Itali, është bërë në Spanjë, në Portugali, në Hungari. Pra, kemi marrë modelet e vendeve të tjera. Nuk po bëjmë asgjë që nuk ndodh në një vend tjetër dhe të gjithë ramë dakord që, sigurisht, stimulon konkurrencën. Nuk erdhi përgjigje.

Ndërkohë, në takime të tjera që kemi pasur me një numër më të reduktuar të marketeve që kanë ardhur në takim, kemi diskutuar edhe për një nismë tjetër, duke ndjekur shembullin e Greqisë, për të përcaktuar një listë produktesh të cilat janë me vlerë të ulët, të cilat i dedikohen shtresave në nevojë, të cilat do të angazhoheshin supermarketet t’i shisnin me një fitim minimal ose zero dhe do të fiksonim këto çmime për një periudhë deri në fund të vitit. Dhe për këtë listë, vetëm një nga subjektet, i njëjti subjekt në fakt që solli listën e parë, solli dhe listën e dytë.

Ndërkohë që unë besoj që ne jemi të gjithë për një qëllim dhe duhet që, përveçse qëllimit të fitimit, kompanitë patjetër të mendojnë edhe për mbrojtjen e konsumatorit, edhe për të mirën publike, në kushte kur kemi çmime të rritura dhe kemi çmime mbi mesataren e vendeve të rajonit”, deklaroi ministrja.

Ministri Malaj: Hapësira për rishikim taksash tek produktet ushqimore

Ministri i Financave Petrit Malaj paralajmëroi se taksat mund të rishikohen për produktet ushqimore. Kjo me qëllim uljen e cmimeve të ushqimeve dhe lehtësimin e konsumatorëve.

Gjatë takimit me drejtues të supermarketeve, Ministri Petrit Malaj theksoi rëndësinë e analizimit të marzheve në të gjithë zinxhirin e formimit të çmimit, nga prodhimi ose importi deri te konsumatori final. Një analizë e tillë, theksoi Malaj, do t’i mundësojë Ministrisë së Financave të kuptojë më mirë strukturën e çmimeve dhe të identifikojë hapësirat ku mund të ndërhyhet përmes politikave fiskale, me synim lehtësimin e barrës për konsumatorët.

“Lidhur me sa kemi diskutuar bashkërisht dhe për dobinë e transparencës së çmimeve, nga ana e Ministrisë së Financave po kryhet një ushtrim ku ne duam të kuptojmë se cilat janë marzhet që aplikohen në zinxhirin e formimit të çmimit, qoftë kjo nga momenti i prodhimit deri tek konsumatori i fundit, apo nga importi deri te konsumatori i fundit.

Kjo është e rëndësishme për Ministrinë e Financave sepse në radhë të parë duam të kuptojmë që se në cilat marzhe ne mund të ndërhyjmë me politikat tona fiskale, në mënyrë që të lehtësojmë sadopak barrën për konsumatorin e fundit.

Nga ana tjetër, duam të kuptojmë kush janë ato sektorë që formojnë zinxhirin e çmimit dhe cilat janë marzhet që ato aplikojnë, dhe nëse këto marzhe janë marzhe abuzuese apo janë marzhe të cilat i përgjigjen realitetit të tregut.

Nga ana tjetër, duke bërë një analizë te marzheve, edhe vetë ne kemi një informacion më të thelluar dhe më të qartë për mënyrën e formimit të çmimit”.

Edhe mininistri i Financave Malaj përsëriti mungesën e reflektimit të zhvlerësimit të euros.

“Ka një fenomen që u përmend edhe nga ministrja, zhvlerësimi i Euros. Kemi një zhvlerësim të Euros dhe të ardhurat në buxhet në momentin që importohen produktet vijnë në rënie. Vetëm për 7-mujorin e parë kemi një mungesë në buxhetin e shtetit prej rreth 50 milionë Eurosh që presupozohet që kjo vlerë të paktën të përkthehej në çmime më ulëta, gjë që jo vetëm nuk ka ndodhur por nga analizat e bëra nga Ministria e Ekonomisë na rezulton që jemi me çmimet më të larta mesatare për atë grup produktesh që ne i konsiderojmë produkte të shportës dhe produkte bazike për popullatën mbarë.

Kështu që, është shumë e rëndësishme që ju të përfshiheni dhe këtë ushtrim ta bëjmë të gjithë bashkërisht dhe ta bëjmë në mënyrë vullnetare, sepse në të kundërt do jemi të detyruar pastaj, pasi është një ushtrim që qeveria do ta bëjë, që të fillojmë dhe të vijmë pranë subjekteve për të parë dhe për të bërë analizat e çmimit në mënyrë që të arrijmë tek rezultati që do të arrijë Ministria e Financave.

Ne do ta bëjmë këtë analizë, ne do t’i vlerësojmë të gjitha marzhet sepse është shumë e rëndësishme, sidomos në situatat që po kalojmë, në mënyrë që të dimë se çfarë politikash fiskale do të ndërmarrin që t’ua lehtësojmë sa më shumë konsumatorëve barrën e çmimeve të rritura”, tha ndër të tjera minsitri Malaj.

Platforma “Pasqyra e Çmimeve” pritet të bëhet efektive brenda muajit, duke evidentuar marzhet e fitimit të kompanive dhe bërë transparencë për konsumatorët.

The post Qeveria paralajmëron supermarketet të bëjnë transparencën e çmimeve, Rama: Do thoni në djall ato që fituam appeared first on Fast News Economy.

Në këtë aktivitet ishin të pranishëm përfaqësues nga institucionet e sigurimeve shoqërore të Holandës, Gjermanisë, Suedisë, Sllovakisë, Greqisë, Polonisë, Çekisë, Turqisë dhe vendeve të tjera evropiane. I pranishëm në Seminar ishte edhe Sekretari i Përgjithshëm i ISSA-s, Marcelo Abi-Ramia Caetano, Presidenti i Rrjetit Evropian të ISSA-s, Yunus Elitaş, si dhe drejtues e ekspertë të fushës.

Në fjalën e saj përshëndetëse, ministrja e Ekonomisë dhe Inovacionit, Delina Ibrahimaj, falënderoi ISSA-n për zgjedhjen e Tiranës dhe theksoi rëndësinë e shkëmbimit të përvojave ndërkombëtare në një moment kur Shqipëria po punon për reformën e re të pensioneve.

“Gjatë këtyre dy ditëve ju do të keni mundësi të diskutoni dhe të ndani eksperienca me njëri-tjetrin, nga vende të ndryshme, nga sisteme të ndryshme, nga kultura të ndryshme, nga problematika të ndryshme. Kjo, për ne është veçanërisht e rëndësishme, pasi, siç mbase mund të jeni në dijeni, ne jemi duke menduar për reformën e re të pensioneve. Ndaj dhe, në këtë fazë të rëndësishme të punës që kemi hyrë, ku duhet të finalizojmë detajet e fundit të saj, për ne është e rëndësishme të dëgjojmë eksperiencat tuaja dhe të ndajmë tonat”, u shpreh Ibrahimaj.

Ministrja e Ekonomisë theksoi sfidat me të cilat përballen sistemet e sigurimeve shoqërore, të cilat janë kryesisht demografike, sociale dhe ekonomike, pavarësisht specifikave të secilit vend.

“Të gjithë bashkë kujdesemi në një epokë e cila ka sfida të jashtëzakonshme, si sfida demografike, sfida sociale, sfida ekonomike. Kujdesemi që të krijojmë sisteme të qëndrueshme, të cilat mund t’i rezistojnë kohës dhe të cilat të jenë transparente, të jenë të thjeshta për të kuptuar”, deklaroi ministrja.

Gjithashtu, ministrja Ibrahimaj vlerësoi rëndësinë e ekspertizës dhe bashkëpunimit ndërmjet institucioneve për ndërtimin e sistemeve të sigurimeve shoqërore që u përgjigjen zhvillimeve afatgjata. Ajo theksoi se përvoja e vendeve të ndryshme dhe shkëmbimi i ekspertizës janë të rëndësishme për adresimin e sfidave që hasen në këtë fushë.

Në fokus të seminarit ishte përmirësimi i shërbimeve ndaj qytetarëve përmes digjitalizimit dhe automatizimit të proceseve. Gjatë diskutimeve u trajtuan edhe përdorimi i teknologjive të reja, përfshirë inteligjencën artificiale, zhvillimi i llogaritësve online të pensioneve dhe nevoja për ruajtjen e asistencës njerëzore për personat që kanë nevojë për mbështetje të drejtpërdrejtë.

Programi përfshiu gjithashtu, diskutime mbi komunikimin dhe informimin për pensionet, planifikimin për daljen në pension, shërbimet për të vetëpunësuarit dhe punonjësit e sektorit bujqësor, si dhe trajtimin e rasteve me element ndërkombëtar, përfshirë pensionet dhe karrierat e sigurimit në më shumë se një shtet.

Shqipëria u përfaqësua në diskutimet teknike nga drejtues dhe ekspertë të Institutit të Sigurimeve Shoqërore dhe Ministrisë së Ekonomisë dhe Inovacionit.

Seminari në Tiranë shërbeu si një forum për shkëmbimin e përvojave ndërmjet institucioneve të sigurimeve shoqërore dhe diskutimin e qasjeve të reja për përmirësimin dhe modernizimin e shërbimeve të pensioneve.

The post Reforma e pensioneve drejt përfundimit, ministrja Ibrahimaj: Po finalizojmë detajet e fundit appeared first on Fast News Economy.