Pas tërmetit të fundit me magnitudë 6.4 të shkallës Rihter që goditi Shqipërinë, me epiqendër në Durrës, duket se toka nuk po gjen qetësi.
Sikur të mos mjaftojë pandemia e koronavirusit që ka pushtuar vendin tonë prej më shumë se një muaji, as lëkundjet e tërmetit prej disa ditësh nuk janë ndalur.
Edhe pse me magnitudë të vogël, mund të themi se kanë shkaktuar dëme materiale.
Lëkundja më e fundit ka ndodhur mesnatën e djeshme, rreth orës 00.10, me magnitudë 3.1 të shkallë Rihter dhe me epiqendër po në Durrës.
Kjo lëkundje ka shkaktuar dëme te një pallat në Durrës, i cili më parë ishte i shembur nga tërmeti i 26 nëntorit.
Ashtu sic duket dhe në fotot e mëposhtme, tërmeti i mbrëmshem ka shkaktuar disa dëme materiale në pallatin në fjalë dhe banorët shprehen të shqetësuar në lidhje me këtë gjendje.
Por duhet të themi se në këto kohë, kjo nuk ka qenë lëkundja e vetme, pasi shumë të tjera kanë rënë dhe ditët më parë.
Më e fundit është regjistruar më 18 prill, ku magnituda ishte 3.6 e shkallës Rihter, ndërsa epiqendra 5 km në verilindje të Peqinit dhe 29 km në jug të Tiranës.
Ndërsa më 13 prill një tjetër lëkundje tërmeti ka rënë në Durrës, me magnitudë 3.3 ballë, ndërsa në mesnatën e po kësaj date Durrësi është goditur nga një tërmet me magnitudë 3.1.
Mund të themi se këto lëkundje kanë shkaktuar shumë panik te qytetarët, edhe për shkak të tërmetit shkatërrimtar të 26 nëntorit, por edhe nga situata e krijuar nga koronavirusi, pasi nuk dinë si të reagojnë, në një kohë kur tërmeti e kërkon që të qëndrojnë jashtë, ndërsa pandemia, brenda.
