Mes duatrokitjesh e lotësh, edhe pse në një situatë të kufizuar për shkak të pandemisë, është përcjellë sot për në banesën e fundit një nga aktorët më të mëdhenj të historisë kinematografike në Shqipëri, Rikard Ljarja.
Sipas amanetit të tij të fundit, të cilin ua kishte lënë familjarëve, aktori i madh do të prehet në vendlindjen e tij në Shkodër.
Në ceremoninë mortore nuk ka patur një prezencë të madhe të njerëzve, për arsye të masave të marra kundër përhapjes së koronavirusit.
Mes lotësh, familjarët dhe miqtë e afërm kanë duartrokitur në momentin që arkivoli doli nga banesa.
Gjithashtu nuk kanë munguar edhe miqtë e tij të skenës, të cilët janë parë pranë banesës, edhe pse situata nga COVID19 nuk ka lejuar që të mblidhen shumë persona.
Rikard Ljarja do të mbahet mend gjatë nga dashamirësit e artit shqiptar për gjurmët që la në kinematografinë për të cilën investoi aq shumë.
