Plagosja dhe arrestimi i Orgest Bilbilit/ Klodiana Lala zbardh raportin sekret dhe zbulon çfarë gjeti policia në shtëpinë e tij

Gazetarja investigative Klodiana Lala ka nxjerrë më shumë detaje nga arrestimi i të shumëkërkuarit Orges Bilbili, ku ka siguruar edhe raportin sekret të policisë.

Ky i fundit u arrestua më 11 prill afër Xhamllikut. Në raport thuhet se 30-vjeçari Orgest Bilbili, nga Lushnja, e ka kundërshtuar punonjësin e Policisë dhe është larguar me vrap në brendësi të lagjes.

Punonjësi i Policisë e ka ndjekur dhe gjatë ndjekjes 30-vjeçari i ka drejtuar pistoletën punonjësit të Policisë, duke e kërcënuar për ta vrarë. I ndodhur në këtë situatë, polici e qëlloi me armë në këmbë, ndërkohë që e plagosur mbeti aksidentalisht dhe një vajzë që po kalonte në rrugë.

Gazetarja Klodiana Lala tha për për emisionin ‘Kjo Javë’ se në banesën që Bilbili kishte marrë me qira një muaj më parë është gjetur një stemë policie si dhe shuma prej 900 eurosh, si dhe disa telefona celularë. Lala zbuloi se gjatë momentit kur u plagos dhe teksa polici tentonte t’i vinte prangat, Bilbili theu telefonin e tij, ndërsa ende nuk janë rikuperuar informacionet brenda celularit.