LIGJET E BIZNESIT
Spanja, prodhuesi më i madh i vajit të ullirit në botë, ka vendosur të tërheqë përkohësisht nga tregu rreth 188 mijë ton produkt, në përpjekje për të frenuar rënien e mëtejshme të çmimeve. Për herë të parë, autoritetet spanjolle kanë urdhëruar fabrikat e vajit të ullirit të magazinojnë 12% të prodhimit të tyre, duke e mbajtur atë jashtë tregut deri më 30 shtator 2027.
Masa nis të zbatohet për prodhimin e raportuar nga nëntori 2026 dhe synon të kufizojë furnizimin në treg, në një kohë kur vendi pret një sezon të bollshëm prodhimi dhe disponon rezerva të konsiderueshme. Vaji mund të magazinohet në ambientet e vetë fabrikave ose në struktura të palëve të treta, ndërsa vendimi nuk përfshin prodhimin e raportuar për tetorin dhe muajt paraardhës.
Sipas të dhënave të autoriteteve, rezervat fillestare arrijnë në rreth 357 mijë tonë, ndërsa prodhimi për sezonin parashikohet të shkojë në 1.6 milionë tonë. Kjo ofertë e lartë rrezikon të ushtrojë presion të mëtejshëm mbi çmimet, duke ulur të ardhurat e prodhuesve. Në fillim të nëntorit, çmimi i vajit të ullirit ekstra të virgjër në Spanjë zbriti në rreth 3 euro për kilogram, nga afërsisht 4 euro për kilogram në të njëjtën periudhë të një viti më parë. Përmes kufizimit të përkohshëm të sasisë në treg, Ministria e Bujqësisë synon të krijojë një ekuilibër më të mirë mes ofertës dhe kërkesës dhe të mbështesë çmimet për prodhuesit. Spanja përfaqëson rreth 45% të prodhimit global të vajit të ullirit dhe afërsisht 70% të prodhimit të Bashkimit Evropian, duke qenë një aktor kyç në tregun ndërkombëtar. Për këtë arsye, vendimi për të tërhequr një pjesë të prodhimit mund të ndikojë edhe në dinamikën e furnizimit dhe çmimeve në tregjet e tjera.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
