Nuk falen qiratë! Ja si do veprohet me pagesën e prillit e majit, 3 kategoritë që përfitojnë

Një nga cështjet më të diskutuara së fundmi është dhe pagesa e qirave për muajin prill dhe maj, pas situatës së shkaktuar nga koronavirusi në vend.

Mësohet se këto para nuk do të falen por do të shtyhen me dy muaj për disa kategori.

Ditën e sotme në mbledhjen e Komisionit parlamentar të qeverisë është diskutuar skema e propozuar, në të cilën ishin të pranishëm zv. ministrat Mira Rakacolli dhe Julian Hodaj.

Akti normativ përcakton tre kategoritë që përfshihen:

1 – Studentët, shkolla e të cilëve është mbyllur për shkak të situatës

2 – Ata që kanë pasur një punë dhe e kanë humbur nga pandemia, dhe që banojnë me qira.

3 – Ato biznese që kanë xhiro vjetore 14 milionë lekë dhe që e kanë ndërprerë biznesin nga situata.

Rakacolli dhe Hodaj thanë se do të ketë të tjera rishikime, bëhet fjalë për kategorinë e atyre që qiranë që marrin e kanë të vetmin burim të ardhurash.

“Një nga problemet që përballen qytetarët është edhe pagesa e qirave, për këtë arsye propozuam që për shkak të situatës, ata individë që kanë humbur punën nga situata të kenë mundësi të mos paguajnë këto muaj, dhe ta paguajnë më vonë. Duhet ta vertetojnë se kanë kontrata qeraje. Është menduar këto qera të paguhen pas 31 majit. Të ketë ndarje proporcionale në muajt në vazhdim”, tha Rakacolli.

Ndërsa Julian Hodaj, u shpreh se qiratë thjesht shtyhen në kohë dhe shpërndarhen në mënyrë proporcionale gjithë pagesa.

“Edhe e drejta për të gëzuar një pronë apo për të përfituar një qira është e drejtë kushtetuese”, tha ai.