Kryeministri Edi Rama ka dalë sërish përpara pak minutash në një komunikim online me qytetarët.
Ai është shprehur se nuk ka asnjë urgjencë në kufirin shqiptar dhe se në Kapshticë janë vetëm 19 qytetarë rezidentë në Shqipëri, që duan të hyjnë për të takuar familjarët, por që nuk do të lejohen ta bëjnë.
Shefi i qeverisë u shpreh se shqiptarët që do të vinë do të karantinohen për 14 ditë në hotele me shpenzimet e tyre.
Ai nuk ka harruar të hedhë akuza dhe në drejtim të ish-kryeministrit Sali Berisha duke thënë se ai kërkon të nxisë katastrofa.
“Keqardhje që mediat nuk transmetojnë pamje live. Kemi një situatë, në Kakavijë nuk ka asnjë që kërkon, në Kapshicë kemi 19 makina të përsonave që janë banorë rezidentë që nuk kanë urgjencë por kërkojnë të hynë për të takuar familjen.
Kur bën patriotin synon që të nxisë katastrofën. Berisha ka shumë vite që kërkon të shkatërrojë Shqipërinë. Ata si Saliu i bien këtij avazi që është i patolerueshëm në këtë kohë. Është e patolerueshme që të nxiten njerëzit për të ardhur këtu. Kufijtë janë të mbyllur.
Ne kemi vendosur që brenda 24 orëve të ardhshme të hyjmë në një proces të ndërmjetëm. Kush do të vijojë me dokumente rezidente të vendeve të tjera s’do të hyjë dot. Të tjerët do të karantinohen në hotele me shpenzimet e tyre. 14 ditë në hotel në dhomë mbyllur do të marrë ushqim me çmim fiks,“-tha Rama.
