Presidenti Ilir Meta ka kërkuar nga qeveria që të gjejë sa më shpejt një zgjidhje në lidhje me situatën e shqiptarëve të bllokuar në dogana për shkak të koronavirusit.
Përmes një mesazhi të shpërndarë dhe në rrjetet sociale, Meta kërkon gjetjen e një zgjidhje duke respektuar protokollin anti-COVID, por edhe duke pasur parasysh detyrimet që shteti shqiptar ka ndaj qytetarëve të tij.
Presidenti kërkon solidaritet me ata qytetarë, të cilat janë lënë në mëshirë të fatit.
Jam shumë i shqetësuar mbi situatën e qytetarëve shqiptarë të cilët vijojnë ende të bllokuar në pikat e kalimit kufitar të Kakavijës dhe Kapshticës. Kjo situatë duhet të marrë zgjidhje të menjëhershme.
U bëj thirrje sërish të gjithë qytetarëve shqiptarë të respektojnë kushtet e urgjencës dhe domosdoshmërisë të imponuara nga pandemia e COVID-19 në pikat tona kufitare e njëkohësisht kërkoj nga autoritetet tona përgjegjëse të respektojnë, jo vetëm kërkesat e situatës së gjendjes së fatkeqësisë natyrore, por edhe detyrimet kushtetuese dhe ndërkombëtare që shteti ka ndaj qytetarëve të vet në një situatë të tillë.
Edhe njëherë kërkoj nga të gjithë më shumë bashkëpunim e mirëkuptim, solidaritet e përgjegjësi mes qytetarëve dhe autoriteteve tona në dobi të interesit publik dhe sigurisë së jetës.
