Arjan Mezini, mjek në spitalin “Shefqet Ndroqi” në një intervistë për “Ora News” u pyet për efektet që jepte kanabisi kundër COVID-19.
Mjeku bëri me dije se në këtë spital momentalisht po trajtohen 5 pacientë me koronavirus të cilët janë në terapi intensive, 2 prej të cilëve në frymëmarrje të drejtuar.
Përsa i përket efikasitetit të kanabisit kundër koronavirusit mjeku e konsideroi marrëzi.
Pjesë nga biseda:
Mezini: Nuk e di ku e keni dëgjuar këtë tezë që kanabisi mund të jetë efikas kundër COVID 19, po më habisni, nuk kam shpjegim për këtë. Janë marrëzira.
Përsa i përket përqindjes së lartë të vdeshmërisë në raport me numrin e të infektuarve, mjeku thotë se problemi qëndron tek numri i ulët i testeve.
Mezini: Po të kishim një testim më të gjerë, por të kishim identifikuar grupin e asimptomatikëve kjo përqindje në krahasim me numrin e të prekurve do të ishte më e ulët.
Më tej mjeku shton se është dakord me masat e marra por shton se masat duhet të ishin më të harmonizuara me njëra-tjetrën nga ana tjetër thotë se do të duhet të ketë një zgjatje të orarit të ushtrimit të aktivitetit për ushqimoret dhe farmacitë që të mos ketë dyndje të njerëzve në mënyrë që njerëzve të mos iu shkaktohej stres nga kjo gjë.
Mezini: Unë jam dakord me masat dhe do isha më dakord që masat të ishin më të harmonizuara me nëra-tjetrën në funksion të këtij zinxhiri epidemik. Problemi më i madh që shoh në media është dyndja në tregje e dyqane. Ndoshta mund të merrej një masë që orari i dyqaneve të zgjatej dhe njerëzit të dilnin me aplikacion e-Albania dhe nuk do krijohej stres te njerëzit për të vajtur në dyqane, kuptohet për supermarketet, dyqanet dhe farmacitë, jo shërbime të tjera.
