Qyteti që shënoi më shumë raste të prekurish nga koronavirusi ditën e sotme ishte Shkodra, ku nga 27 raste për 24 orët e fundit, 12 u shënuan në këtë qytet.

Mësohet se personat e infektuar janë të gjithë anëtarë të dy rretheve familjare në lagjet Kiras dhe Dobraç.

Sipas informacioneve shkak për këtë përhapje është bërë një ceremoni varrimi përpara dy javësh, e cila ka ndikuar dukshëm në infektimin e anëtarëve të këtyre familjeve.

Në të dhënat që bëri të ditura zv. ministrja e Shëndetësisë Mira Rakacolli në një komunikim zyrtar, thuhej se mes të infektuarve është dhe një fëmijë i moshës 13 vjec.

“Siç shihet, nga rastet e reja të 24 orëve të fundit, Shkodra ka numrin më të lartë me 12 raste. Këto raste janë identifikuar në dy rrethe familjare, mes tyre është dhe një fëmijë 13-vjeçar, që janë identifikuar falë gjurmimit të rasteve të kryera nga epidemiologët ne terren.
Kjo rritje e numrit të rasteve në Shkodër tregon edhe njëherë mos respektimin e distancimit social dhe masave të kontrollit të infeksionit që Ministria e Shëndetësisë vijon të rekomandojë çdo ditë ne komunikimet publike.” , u shpreh Rakacolli.

Kujtojmë se deri më tani në të gjithë Shqipërinë numri i të infektuarve ka shkuar në 304, ku 16 prej tyre kanë humbur jetën dhe 89 të tjerë janë shëruar.