Është miratuar dhe botuar nga qeveria në Fletoren Zyrtare vendimi për pezullimin e dhënies së qirasë për muajin prill dhe maj, për shkak të situatës së krijuar nga pandemia e koronavirusit.
“Të gjithë qiramarrësit individë, të cilët kanë kontratë qiraje për banesë apo çdo dokument tjetër që vërteton marrëdhënien kontraktore qiradhënës–qiramarrës, përpara shpalljes së gjendjes së epidemisë, që kanë kontratë pune por e kanë pezulluar/zgjidhur atë si pasojë e gjendjes së shkaktuar nga COVID–19, nuk do ta paguajnë detyrimin e qirasë për dy muaj, prill dhe maj 2020”, thuhet në vendim.
Aty përfshihen dhe qiramarrësit student, të cilët kanë kontratë qiraje për banesë apo dokumenta të tjerë.
Të gjithë qiramarrësit persona fizikë/juridikë me të ardhura deri në 14 000 000 (katërmbëdhjetë milionë) lekë në vit, të cilët kanë kontratë noteriale qiraje për zhvillimin e aktivitetit të tyre nuk do të paguajnë detyrimin e qirasë për dy muaj, prill dhe maj 2020.
“Detyrimi i prapambetur i këtyre dy muajve do të paguhet nga qiramarrësi, në mënyrë proporcionale dhe të dakordësuar me qiradhënësin, pas muajit maj 2020”, thuhet në vendim.
Gjithashtu, ndër të tjera në vendim citohet se të gjitha kontratat e banesave që ju përfundon afati me 31 maj 2020, detyrimi i prapambetur do të paguhet nga qiramarresi brenda tre muajve, pas datës 31maj të këtij viti.
