Edhe pse në mes të një krize të madhe, apo siç kryeministri e ka quajtu „luftë kundër koronavirusit“, nuk do të thotë se argumentet e zakonshme të politikës shqiptare nuk do të vazhdojnë.
Kështu, në një kohë, kur të gjithë janë mbyllur nëpër shtëpi dhe Parlamenti nuk i zhvillon punimet e tij normalisht që prej tre javësh, sot mblidhet Komisioni Hetmimor për Shkarkimin e Presidentit Meta.
Përmes platformave online ky Komision e kishte të domosdoshme mbledhjen, për të kërkuar zgjatjen e veprimtarisë së tij, për shkak se në fund të këtij muaji mbaronte afati i përcaktuar më herët nga Kuvendi.
Vlen të theksojmë se Komisioni i Venecias ka vendosur që ta shtyjë për në muajin qershor dhënien e vendimit për dy çeshtjet e nxehta të politikës shqiptare, atë për shkarkimin e Metës dhe për emërimin e anëtarëve të Gjykatës Kushteteuese.