“Presim 10 mijë tamponë dhe 50 respiratorë të tjerë brenda prillit”/ Manastirliu tregon se kur arrihet piku në Shqipëri

Ministrja e Shëndetësisë Ogerta Manastirliu thotë se ende nuk mund të flasim me siguri për pikun e epidemisë së Koronavirusit në Shqipëri.

Fjala e Ministres Manastirliu:

“Sot nuk mund të flasim me siguri për pikun, me ekipin e ekspertëve të ngritur në ministrinë e Shëndetësisë, ne kemi bërë të gjithë skenarët, por modelet tregojnë se nuk ka ato që mund të jenë 100% të sakta. Skenar të saktë nuk ka as Amerika, prandaj duhet të vlerësojmë masat që kemi ndërmarrë, pasi pa masa të forta kurba do të kishte një të përpjetë të rrezikshme. Prandaj kemi marrë masa të forta për të zbuluar kurbën. Ne po synojmë shtrirjen në kohë, pasi në të kundërt do të ishte fatale për sistemin shëndetësor. Dua të jap një informacion për spitalet. Ne sot kemi vendosur në dispozicion dy spitale, Infektivi me 120 krevatë, 76 janë të shtruar. Kemi hapur edhe spitalin e dytë 190 krevat Sanatoriumi, por kemi pasur vetëm një rast urgjent kirurgjie. Në skenarin tjetër, është Kirurgjia e vjetër në QSUT që është bërë gati për të pritur raste, por edhe spitali i katërt karantinë, që do të ketë 100 krevatë. Brenda një jave do të vijë pjesa e parë e respiratorëve, ndërsa presim që brenda prillit të kemi 50 respiratorë të tjerë, përveç 54 që kemi blerë, por pritet lëvrimi i tyre. Sa i përket tamponëve ne presim që jo vetëm të kemi 10 mijë tamponë dhe për të pasur edhe cilësi për kitet. Deri tani janë kryer mbi 1500 testime. Po punojmë që edhe spitali ‘Shefqet Ndroqi’ të ketë një laborator të vetin për analizat për koronavirusin” përfundoi Ministrja Manastirliu.