Pedagogia Jonila Godole me anë të një reagimi në rrjetet sociale shprehet se sipas të gjitha gjasave Shqipëria do të marrë nesër dritën jeshile për çeljen e negociatave.
Sipas pedagoges ky është një lajm pozitiv që sjell shpresë për të ardhmen.
Statusi i pedagoges:
“Më në fund një lajm i mirë! Sipas të gjitha gjasave Shqipëria do të marrë nesër dritën jeshile për çeljen e negociatave. Aplikimi për në BE nga ana e Shqiperisë është bërë në 24 prill 2009, dhe gati 11 vjet më pas mund të hapet porta për në EU, edhe pse rruga deri në pranimin final do të jete ende e gjatë. Nuk dihet se çfarë i ka bërë të ndryshojnë mendjen Franca, Holanda dhe Brukseli, sepse realisht nga kerkesat e bëra nuk është plotësuar asnjëra plotesisht, shto këtu shtimin e problematikave të reja si ligji “anti-shpifje” që mundëson censurimin e mediave online, për të cilin vendet anëtare të BE kërkojnë të shihet me përparësi?!
Njësoj si në rastin e Rumanisë dhe Bullgarisë shumë vite më perpara, arsyet edhe në rastin e Ballkanit Perëndimor mund të jenë gjeostrategjike, BE i duhen kufij më të sigurtë politike dhe ekonomike, ndër të tjera. Por sidoqoftë për shqiptarët ky është një lajm shumë pozitiv, sjell shpresë për të ardhmen. Mbase edhe motivon për të luftuar me më forcë për një politikë të pakorruptuar, të përgjegjshme për shtetasit e vet dhe largpamëse” – shkruan ajo në “Facebook”.
