Prokuroria mbyll hetimet, Tahiri njihet nesër me akuzat

Gjykata për Krimet e Rënda i vendosi afat Prokurorisë deri më 10 mars që të mbyllte hetimet dhe të dorëzonte për gjykim dosjen në ngarkim të ish-ministrit të Brendshëm, Saimir Tahiri.

Vendimi i Gjykatës u mor pas kërkesës së vetë Tahirit, që pas vendimit të prokurorisë për të zgjatur për herë të pestë afatin hetimor dorëzoi një kërkesë kundër këtij vendimit të organit të akuzës.

Sot Prokuroria e Krimeve të Rënda, ka njoftuar se ka mbyllur hetimet për Saimir Tahirin dhe përveç tij ka marrë si të pandehur edhe 3 ish-zyrtarët e lartë të Policisë së Vlorës, Jaeld Çelen, Gjergji Kohilën dhe Sokol Boden.

Ish-ministri i Brendshëm do të paraqitet të enjten në orën 13:00 për t’u njohur me akuzat zyrtare që do të ngrihen ndaj tij. Ndërkohë, avokati i Çelës do të paraqitet ditën e sotme për të mësuar akuzat. Mbi 3 ish-zyrtarët e lartë të Policisë së Vlorës rëndon akuza e trafikut të lëndëve narkotike.

“Gjithçka që po ndodh e ka kapërcyer çdo limit të kohës kur mund të bëhet një hetim. Një gjendje e tillë mjegullnaje nuk mund të vijojë më. Hetimet janë zgjatur pesë herë, ka kaluar çdo afat i arsyeshëm, zgjedhja duhet të marrë zgjidhje në një mënyrë apo tjetër. Drejtësia e vonuar nuk është më drejtësi, e nëse kjo ndodh me mua, imagjinoni se çfarë ndodh me të tjerët, që përplasen para gjykatave”, deklaronte në fillim të këtij muaji ish-ministri i Brendshëm, pasi ishin shtyrë disa herë hetimet.