I pranishëm në një event në Komisariatin e Policisë Rrugore në “Kinostudio”, ministri i Brendshëm, Sandër Lleshaj, deklaroi se policët janë gati për ruajtjen e rendit dhe se efektivët parësore kanë sigurinë kombëtare. Kujtojmë se PD dhe LSI, kanë organizuar një protestë sërish ditën e sotme, para Parlamentit, për shkak të manovrës së mazhorancës.
I pyetur a do të arrestohet Dako, Lleshaj është përgjigjur: “Policia e Shtetit do të zbatojë vetëm ligjin në rast se vjen një urdhër arresti nga Prokuroria për Kryetarin e Bashkisë Durrës, Vangjush Dako. “Policia nuk merr udhëzime as nga Kryeministri as nga ministri, Policia merr udhëzime nga ligji”.
Lleshaj hodhi poshtë pretendimet e opozitës për deklarata politike para protestave të organizuara prej saj, ndërsa shtoi se nuk e konsideron si masë drastike heqjen e valëve të telefonisë celulare, siç ndodhi gjatë protestës së fundit të opozitës. “Kjo nuk është masë drastike kur bëhet në shërbim të sigurisë dhe mbarëvajtjes së protestës”, tha Lleshaj.
