LIGJET E BIZNESIT
OFL-ja i ka sekuestruar makinën e blinduar edhe Landi Muharremit, i njohur ndryshe edhe si ‘Rrumi’ nga Shijaku.
Operacioni Forca e Ligjit vijon aksionin e saj për goditjen e ‘kokave’ të krimit të organizuar. OFL-ja i ka sekuestruar makinën e blinduar edhe Landi Muharremit, i njohur ndryshe edhe si ‘Rrumi’ nga Shijaku, që ishte në makinë me prokurorin Arjan Ndoja kur iu bë atentat në Shkozet. Mësohet se Landi Muharremit i është sekuestruar makina tip Audi me targë “AA800YY”.
Muharremi nuk është një emër i panjohur për Policinë pasi në shtator të vitit 2016 ai u shpall në kërkim nga policia për rrahjen e biznesmenit libanez Faadi Mitri në sy të gruas dhe vajzës së tij. Landi Muharremi që njihet dhe si i “tmerrshmi i Sukthit”, u shpall në kërkim në atë kohë dhe akuzohej si autori i rrahjes së biznesmenit. Muharremi kishte pretendime mbi pronësinë e sipërfaqes së zonës turistike në zonën e Gjirit të Lalzit ku pritej që të investonte biznesmeni libanez me ndërtimin e një kompleksi, i cili pas dhunimit me shkop bejzbolli u largua nga Shqipëria. ‘Omnix Albania’, kompania e Mitrit do të investonte 450-të milionë euro tek Gjiri i Lalzit. Por pas dhunimit fizik që iu bë presidentit të Omnix Fadi Mitri, kompania u tërhoq nga investimi në Shqipëri.
