Thaçi: Do të kandidoj përsëri për president të vendit

Presidenti i Kosovës, Hashim Thaçi tha se pasi t’i skadojë mandati, ai do të rikandidoj përsëri për president të vendit.

Në pyetjen e Adi Krastës, për emisionin “A Show”, se çfarë do të ndodhë me Hashim Thaçin pasi t’i skadojë mandati, presidenti tha se do të kandidojë përsëri për të njëjtën pozitë.

“Do të respektoj kushtetutën dhe ligjet e vendit. Do t’iu shërbej qytetarëve pa dallim. E se ku do jem pas mandatit presidencial, mendoj se është herët të flitet, por janë dy mundësi, e para të bëhen ndryshimet kushtetuese që presidenti të zgjedhjet nga qytetarët, pra do të rikandidoj dhe do të zgjidhem përsëri, kësaj radhe me votën e popullit, jam i bindur për këtë”, është shprehur Thaçi.

Tutje, Thaçi tha se nëse partitë e donë atë president, le ta ndryshojnë kushtetutën pasi ky i fundit është i bindur që do të rizgjedhet

“Pra, partitë le të vlerësojnë vet, nëse e duan president Thaçin le ta ndryshojnë kushtetutën, nëse nuk e duan mos ta ndryshojnë, unë do të kandidoja përsëri”, shtoi Thaçi.

Presidenti Hashim Thaçi iu rikthye temës së kufijve me Serbinë. Ai thotë se mbështet idenë që Presheva, Medvegja dhe Bujanoci t’i bashkohen Kosovës, por pa dhënë asnjë centimetër territor në këmbim.

“Unë jam për korrigjim të padrejtësive historike, jam që Preshevë, Medvegjë dhe Bujanoc t’i bashkangjiten Kosovës, pa prekur asnjë centimetër të Kosovës. Nuk ka pasur propozim amerikan për ndryshim të kufijve”, deklaroi Hashim Thaçi.

Presidenti i Kosovës konfirmoi se është takuar disa herë me Alex Soros, djalin e George Soros. Ai thotë se e ka mik shumë të mirë dhe këmbëngul se në vend që të sulmohet, Kosova duhet të jetë mirënjohëse për ndihmën e Sorosit në forcimin e demokracisë dhe të institucioneve në vend.

Presidenti i Kosovës foli për herë të parë për vendimin e Vjosa Osmanit për zhvendosjen e fotografisë së tij nga zyra e kryetares së Kuvendit të Kosovës. Thaçi tha se nuk ka asnjë “ndjesi private, personale, në asnjë rrethanë” rreth veprimit të Osmanit.

“Sjellja e kryetares së Kuvendit duhet të jetë në raport me institucionet dhe me ligjin. Të gjithë duhet të jemi shembull të sjelljes institucionale, dhe jo të sjelljeve të inateve politike, apo sjelljeve artificiale, me pretendim elektoral”, është shprehur ai.