Kreu i Policisë së Shtetit, Ardi Veliu e ka kaluar me sukses provesin e Vettingut.
Vendimi është dhënë nga Komisioni i Jashtëm i Vlerësimit, ku gjatë seancës është konstatuar se numri një i Policisë së Shtetit nuk ka asnjë problem në të tre shtyllat e vlerësimit: pastërtinë e figurës, aftësitë profesionale dhe deklarimi pasuror.
PASURIA
Për sa i përket pasurisë, drejtori i Përgjithshëm i Policisë rezulton se ka porositur një apartament në Tiranë, në vitin 2017, me vlerë 79 mijë euro. Apartamenti është në ndërtim, ndërsa për blerjen e tij, ai ka marrë 5 milionë lekë kredi, të cilën vijon ta shlyejë. Ndërkohë, aktualisht Ardi Veliu jeton në shtëpi me qira dhe nuk rezulton të ketë pasuri të tjera të paluajtshme. KJV ka zbuluar nga hetimi se ai ka një llogari bankare prej 750 mijë lekësh nga të ardhurat, ka llogari page 190 mijë lekë, si dhe 5 mijë euro të përfituara nga shitja e një makine. Ndërsa tashmë ai nuk ka makinë në pronësi të tij. Sa u përket të ardhurave të bashkëshortes së Veliut, ajo ka 800 mijë lekë nga paga dhe një depozitë 2 milionë e 400 mijë lekë të dhuruara nga prindërit pas shitjes së një apartamenti në Vlorë. Në këtë mënyrë, KJV ka arritur në përfundimin se Ardi Veliu ka deklaruar saktë pasurinë, ka burime të ligjshme dhe nuk ka konflikt interesash.
PASTERTIA E FIGURES
Sa i përket kontrollit të figurës, DSIK ka konfirmuar se Ardi Veliu ka certifikatë sigurie tepër sekret deri në vitin 2022 dhe nuk rezulton të ketë asnjë informacion implikues ndaj tij. Por, në vitet 2002, 2003 dhe 2007, sipas DSIK, ka raportime se Veliu ka qenë i implikuar në lëvizjen e klandestinëve, favorizimin e falsifikimit të vizave, por që këto nuk kanë pasur vijueshmëri dhe nuk është hapur proces penal, si dhe nuk është marrë nën hetim apo i pandehur. I pranishëm në seancën dëgjimore, Ardi Veliu ka sqaruar pretendimet për përfshirje në falsifikim pasaportash në vitin 2007, duke thënë se prej 15 gushtit të 2006-ës nuk ka qenë pjesë e Policisë së Shtetit.
Ndërkohë, po sot pritet që përpara KJV të dalë dhe drejtori i Drejtorisë Hetimore Qendrore në Departamentin për Policinë Kriminale, Artan Shkembi.
Shkëmbi mban detyren e kreut të Task Force “Forca e Ligjit” në Policinë e Shtetit, si dhe gjithashtu është pjesë e 18 emrave që kaluan fazën e garës për kreun e Byrosë Kombëtare të Hetimit.
