LIGJET E BIZNESIT
Një vendim i fortë është marrë nga Gjykata e Posaçme, ku një prej dosjeve më të bujshme, ajo e “Bajrave” është dërguar tashmë në Prokurorinë e Shkodrës.
Pasi u konstatua se SPAK nuk është kompetente për këtë çështje, për të dyshuarit ka rënë akuza e grupit të strukturuar kriminal.
Kështu, të akuzuarit Safet Bajri, Ilir Bajri, Behar Bajri, Astmer Bilali, Ismet Idrizi, Emrah Plaku, Enver Bajri, do të hetohen në Prokurorinë e Shkodrës.
Kujtojmë se më 22 shtator 2018 policia zhvilloi një operacion, ku u arrestuan 11 persona, ndër të cilët edhe Safet dhe Enver Bajri
Fillimisht ata akuzoheshin për një sërë veprash penale si “Vrasje me dashje e mbetur në tentativë”, në bashkëpunim, “Vrasje me dashje”, e kryer në bashkëpunim, “Prodhim dhe mbajtje pa leje të armëve dhe municioneve luftarake”, “Organizim i llotarive të palejuara”, “Pastrim i produkteve të veprës penale” të kryer në bashkëpunim, “Shtrëngim me anë të kanosjes ose dhunës për dhënie të pasurisë”, kryer në bashkëpunim, “Përkrahje e autorit të krimit”, ‘Moskallëzim krimi”, “Prodhim e shitje e lëndëve narkotike”, të gjitha këto të kryera në kuadër të një grupi të strukturuar kriminal.
Grupi akuzohej për dy vrasje, njëra në 7 shkurt 2001, ku u vra shtetasi A.T., dhe ngjarje e datës 20 qershor 2002, ku u vra shtetasja F.H., 15 vjeçe. Po ashtu akuzoheh edhe për një kanosje ndaj disa shtetasve për të dhënë shumë parash, por duket se të gjitha këto akuza tashmë do të hetohen nga prokuroria e Shkodrës.
