Ka dalë sot në seancën e parë gjyqësore, Lulzim Cuku, personi që vrau me thikë bashkëshorten e tij Manjola Cuku, 5 ditë më parë në banesën e tyre.
Ndërkohë gjykata ka vendosur të japë masën e sigurisë “Arrest me burg” për Cukun, ndërkohë që ky i fundit në dëshminë e dhënë ka treguar se ishte xhelozia faktori kryesor që e ka shtyrë të vrasë gruan.
I pandehuri është shfaqur në bankën e të akuzuarit në gjendje të rënduar psikologjike dhe ka folur për gjendjen në të cilën ndodhej prej kohësh me bashkëshorten.
“Prej tre muajsh kemi nisur te debatojme. Kisha arsye se kisha gjetur gjera te cuditshme ne shtepi qe me benin te dyshoja se me tradhetonte. Vjehrri me tha qe shtepia eshte kthyer ne vend drogaxhinjsh, prandaj vendosa ta merrja me vete ne Greqi. Por ajo nuk pranoi”, ka thënë në sallën e gjyqit Lulëzim Cuku.
Kujtojmë se krimi i rëndë ndodhi në Xhafzotaj të Durrësit ditën e Shtunë.
Lulzim Cuku kishte vetëm pak ditë që kishte ardhur nga Greqia, ku jetonte e punonte si emigrant.
Pas një sherri, ai qëlloi me thikë bashkëshorten Manjola Cuku në gjymtyrët e trupit duke i shkaktuar vdekjen.
Më herët Manjola Cuku kishte marrë dhe urdhër mbrojtje.
Policia gjeti pranë trupit të viktimës edhe tre fëmijët e mitur.
Shkak i ngjarjes së rëndë ishte xhelozia e bashkëshortit, i cili u vetëdorëzua pak orë pas krimit.
