LIGJET E BIZNESIT
Kryetarja e Lëvizjes Socialiste për Integrim Monika Kryemadhi ka mbërritur në zyrë në selinë e LSI-së që në orën 08:30. Kryetari i PD, Lulzim Basha ka shkuar në seli ku janë mbledhur një numër i madh mbështetësish. Nga andej Basha deklaroi se demokratët janë tashmë qytetarë të thjeshtë, pasi mandatet i kthehen popullit.
Basha tha se ky është një mesazh që duhet ta dëgjojë mirë kryeministri Edi Rama. Kryedemokrati shtoi se efekti i parë është rrethimi i parlamentit me gjemba dhe arratia e Ramës.
“Është një mesazh që duhet ta dëgjojë mirë Edi Rama dhe pupacët e tij në ministrinë e Brendshme. Policia e Shtetit përbëhet nga burra e gra të keqpaguar. Shumë prej tyre kanë janë detyruar të paguajnë ryshfete të majme për të mbajtur vendin e punës. Sot ditë historike, mandatet i kthehen popullit. Sot do të bëjmë realitet djegien e mandateve parlamentare. Efekti i parë është rrethimi i parlamentit me gjemba dhe arratia e Edi Ramës nga Tiranë.
Mandatet do të digjen sot, parlamenti ka mbyllur dyert në mënyrë antikushtetuese sepse nuk është më parlament dhe qeveria për sot është larguar. Ne përmes bashkimit qytetar do të bëjmë të mundur që këto mos të jenë ngjarje të vetëm një dite por të kthehen në zgjidhje politike”, deklaroi Basha
