Një ngjarje makabër tronditi sot qytetin e Korcës, ku 42-vjeçari Zamir Topi qëlloi me sëpatë për vdekje 50-vjeçarin Dashnor Osmani.
Të dy, dhe autori dhe viktima ishin banues në fshatin Pocestë të Korcës, ndërkohë që ngjarja e rëndë ndodhi në pazarin e qytetit.
Mësohet se fillimisht ata kanë nisur të konfliktohen me njëri-tjetrin, derisa Zamir Topi e ka qëlluar në kokë me sëpatë, duke i shkaktuar vdekjen viktimës Dashnor Osmani.
Autori është shoqëruar nga policia pas krimit makabër dhe ndërkohë është zbardhur dhe dëshmia e tij në komisariat.
Dyshohet se të dy personat janë konfliktuar për varrin e mamasë së autorit, Zamir Topit.
Topi dhe Osmani, bashkëfshatarë, kanë varrosur në 2014 të afërmit pranë njëri-tjetrit. Topi pretendonte se Osmani i kishte dëmtuar varrin e të ëmës dhe kishte vendosur eshtrat e nënës së tij.
Por ata kanë pasur konflikte të herë pas hershme për këtë çështje.
“E godita disa here me sëpate të cilën e bleva sot në mëngjes. Ishalla nuk vdes. Nuk dua të bej krim. Unë nuk jam kriminel. Prej vitesh jemi grindur me njëri-tjetrin. Ai vendosi eshtrat e nënës së tij tek varri i nënës time. Nuk e duroja dot këtë gjë. E kisha paralajmëruar. Nuk gjeja qetësi. I thashë sërish sot por nuk mori vesh. Ndaj e godita”, ka deklaruar autori në polici, duke shfaqur pendesë për krimin e kryer.
