LIGJET E BIZNESIT
Pas zbulimit të tenderit të dhënë nga Ministria e Brendshme për gruan e ish-kreut të Bashkisë Vorë, Agim Kajmaku, ka reaguar Partia Demokratike me anë Sekretarit të Përgjithshëm Gazment Bardhi.
Përmes një postimi në rrjetin social Facebook, Bardhi shkruan se Edi Rama ka mbrojtur Agim Kajmakun, dhe i ka dhënë tender kur ka qenë në kërkim.
Ndërsa, më tej shton se tenderi duhet anuluar dhe ish-kreu i parë i Bashkisë Vorë duhet të shkojë në burg.
“Faktet janë të pakundërshtueshme: 1. PD publikoi në Gusht 2019 dokumenta se Agim Kajmaku i Vorës rezulton i dënuar në Greqi, por Edi Rama e mbrojti. 2. Denoncimi i Partisë Demokratike u faktua i vërtetë, por Edi Rama nuk e shkarkoi. 3. Drejtësia kërkoi arrestimin, por Agim Kajmaku u lajmërua më parë dhe u lejua të arratiset. 4. Agim Kajmaku u arratis në nëntor 2019, por Edi Rama i dha në janar 2020 tender 57 milionë lekë.
Duke i dhënë miliona lekë një personi në arrati, që ai e emëroi kryebashkiak të Vorës dhe nuk guxoi ta shkarkonte, Edi Rama dëshmon, në mënyrë të përsëritur, se e vetmja gjë që di të bëjë është të palçkisë paratë e shqiptarëve me ca kriminelë, oligarkë dhe të korruptuar. Ky tender kriminal duhet anulluar! Paratë e shqiptarëve nuk mund t’i marrë një i arratisur që e ka vendin në burg!”, shkruan Bardhi.
