E vranë dhe e dogjën me cigare në Francë/ Vjen në Shqipëri trupi i Brunilda Kovaçit

Ka mbërritur në Shqipëri trupi i Brunilda Kovaçi, e cila u gjend e vrarë dhe pjesërisht e djegur më datë 24 dhjetor në afërsi të Kanës.

Mes dhimbjes së madhe,  nëna e Brunildës ka folur për mediat duke rrëfyer se hera e fundit që ka folur me vajzën e saj ishte data 15 dhjetor kur Brunilda i kishte thënë se do vinte në Shqipëri për festat e fundvitit.

“Kur kam biseduar nuk më ka thënë gjë. Do vij në Shqipëri për të festuar Vitin e Ri, me ty me vëllezërit dhe motrat”, tha Fatime Kovaçi, nëna e viktimës.

Mësohet se 37-vjeçarja nga Berati punonte si prostitutë në Francë, ndërsa trupi i saj u gjet nga kalimtarët e rastit. Policia arrestoi më pas një të ri që punonte si kamionist me akuzën se e kishte vrarë Brunildën.

Brunilda Kovaçi, ishte nënë e një fëmije të mitur dhe u gjet gjysmë e zhveshur natën e Krishtlindjeve në një park të qytetit ndërsa trupi i saj ishte pjesërisht i djegur.

Nëna e Brunildës ka thënë se vajza nuk kishte asnjë shqetësim kur fliste me te nuk kishte ndonjë problem.

“Të vijnë të shikojnë motrën për herë të fundit dhe më pas t’i rikthejnë sërish në vëndin e tyre”, bëri apel nëna e Brunildës.