Zjarri në Spitalin e Durrësit/ Policia zbulon çfarë e shkaktoi

Policia ka reaguar për ngjarjen e fundit në qytetin e Durrësit. Spitali Rajonal i Durrësit është përfshirë nga flakët gjatë orëve të para të mesnatës.

Përmes një njoftimi zyrtar, Policia e Durrësit, nga hetimet e para, deklaron se shkak i zjarrit ka ardhur si pasojë e përfshirjes nga zjarri të katër kabinave elektrike të katër kateve.

Njoftimi i policise për spitalin e durresit

Më datë 11.01.2020, në orën 00:25, në repartin e ortopedisë në spitalin e  Durrësit, ka rënë zjarr, i cili ka përfshirë kabinat elektrike të pavijonit.

Menjëherë kanë shkuar forcat e Policisë dhe zjarrfikësit.

Shërbimet e Policisë, zjarrfikësit dhe personeli kanë bërë të mundur evakuimin e të gjithë pacientëve nga të katër katet e pavijonit duke i transferuar në një pavijon tjetër.

Si pasojë e zjarrit janë asfiksuar 5 pacientë, të cilët janë dërguar në spitalin e traumës në Tiranë, për mjekim të specializuar dhe ndodhen jashtë rrezikut për jetën.

Nga veprimet e para hetimore rezulton se shkaku i zjarrit ka ardhur si pasojë e përfshirjes nga zjarri të katër kabinave elektrike të katër kateve, ku zjarri fillimisht ka nisur në katin e parë dhe ka vazhduar deri në katin e katërt.

Grupi hetimor, nën drejtimin e prokurorisë po vijon punën për zbardhjen e plotë të shkakut të përfshirjes së kabinave elektrike nga zjarri.