Snajperë dhe maska kundërgaz, masat e policisë për protestën e opozitës

Policia ka kaluar në gadishmëri për protestën e opozitës. Forca të shumta kanë rrethuar kryeministrinë, teksa Drejtori i përgjithshëm i Policisë, Ardi Veliu, dhe ai i Krimeve të Rënda, Tonin Vocaj kanë inspektuar para fillimit të protestës pozicionimin e forcave të policisë.

Perimetri i godinës është rrethuar nga efektivët e rendit dhe forcave shqiponja, ndërsa forcat speciale RENEA janë pozicionuar në të gjitha pikat e larta përballë, me snajperë të vendosur në tarracën e Kryeministrisë.

Gjithashtu, ka edhe forca operacionale që ndodhen në terren për të bërë të mundur identifikimin e personave me precedentë kriminalë që – siç edhe njoftoi një ditë më parë policia – mund të jenë të pranishëm mes protestuesve. Efektivët janë pajisur me maska kundërgaz

Forcat e ndërhyrjes së shpejtë ndodhen te Sheshi Nënë Tereza, por edhe përgjatë rrugës që të çon te Sheshi “Wilson”, ku ka edhe mjete të rënda të specializuara për shpërndarjen e turmave.