Një ditë pas vrasjes që biznesmenit Kastriot Reçi në Rrëshen, i cili u ekzekutua me një plumb në zemër pas goditjes me snajper, është zbardhur edhe dëshmia e vëllait të tij.
Ngjarja tronditi qytetarët, pasi ndodhi shumë pranë komisariatit të policisë.
Ndërkohë vëllai i viktimës, i cili ishte së bashku me Kastriot Reçin përpara se të ndodhte vrasja, ka treguar momentet e tmerrit kur pa vëllain e shtrirë në tokë, pak sekonda pasi ishte goditur me snajper nga 150 metra distancë.
“Ne sapo kishim parkuar makinën dhe po shkonim tek lokal “Mirdita”. Kastrioti po fliste në telefon dhe unë vazhdova më para dhe u futa në lokal. Akoma nuk ishim ulur në karrige kur dëgjova të bërtitura. Dola menjëherë i habitur se nuk dëgjova krisma. Pashë vëllain të shtrirë përmbys në rrugë. E dërguam në spital. Plumbi ishte mes shpatullave.”, ka treguar vëllai i viktimës gjatë dëshmisë së tij.
