Grupi i Emiliano Shullazit mesa duket nuk po gjen ‘qetësi’ as në Gjykatën e Apelit kundër Krimit të Organizuar dhe Korrupsionit.
Mësohet se seanca gjyqësore ditën e sotme është shtyrë për herë të dytë.
Shkak për këtë vendim është bërë kërkesa e palës mbrojtëse të grupit që ka dërguar një shkresë Këshillit të Lartë Gjyqësor (KLGJ) ku i kërkon të shprehet për 2 gjyqtarët ARtur Kalaja dhe Etleva Temo.
Sipas tyre KLGJ ende nuk është shprehur për gjyqtarët e deleguar, edhe pse kërkesa është bërë që më 23 dhjetor të vitit të kaluar.
Edhe në gjykatën e mëparshme, grupi Shullazi ia doli të mos marrë dënimin me anë të shtyrjes si një telenovelë të seancave për shkak të mos-pranimit të gjyqtarëve.
Prej kohësh tashmë në këtë vijim seancash gjyqësore, të pandehurit kanë kundërshtuar vazhdimisht gjyqtarët.
Kujtojmë se grupi “Shullazi” është dënuar me 13 nëntor 2018, me 55 vjet burg nga Gjykata e Shkallës së Parë për Krimet e Rënda.
Grupi ka vendosur të apelojë këtë vendim.
Emiliano Shullazi është dënuar për gjobëvënie ndaj dy biznesmenëve të njohur Ylvi Beqja dhe Jani Zako, me 14 vjet heqje lirie.
Ndërsa ër katër anëtarët e tjerë të grupit, Gjykata ka dhënë 12 vite burg për Gilmando Danin, Indrit Qyqja 10 vite, Indrit Zela 10 vite dhe Blerim Shullazi 9 vite burg.
