Ditën e sotme është arrestuar presidenti i klubit të Cërrikut Gentian Gjoka, pasi u kap me armë pa leje.
Policia bën me dije se në kuadër të operacionit “Lokalizmi” ka rënë në pranga 45-vjecari lindur në Vlorë dhe banues në Tiranë.
Sipas verifikimeve rezulton se Gjoka ishte shpallur në kërkim nga policia e Vlorës për veprën penale “Mashtrimi”.
NJOFTIMI ZYRTAR I POLICISE
Tiranë Finalizohet një tjetër operacion për goditjen e armëmbajtjes pa leje dhe kapjen e personave në kërkim. Operacioni “Lokalizmi”, i zhvilluar nga Komisariati i Policisë Nr. 2. Kapet një person i shpallur në kërkim, i cili mbante armë zjarri me vete. Sekuestrohet një armë zjarri pistoletë, me një karikator me fishekë luftarak.
Shërbimet e Komisariatit të Policisë Nr. 2, në vijim të punës për kapjen e personave në kërkim dhe të atyre që qarkullojnë me armë zjarri, kanë shtuar kontrollet në gjithë territorin që kanë në juridiksion.
Bazuar në informacionet e marra nga qytetarët se një person në kërkim qarkullonte me armë zjarri, nga shërbimet e Seksionit të Hetimit të Krimeve në Komisariatin e Policisë Nr. 2 Tiranë është organizuar dhe finalizuar operacioni “Lokalizimi”, në kuadër të të cilit u bë kapja dhe arrestimi i shtetasit të shpallur në kërkim: G. Gj., 45 vjeç, lindur në Vlorë dhe banues në Tiranë. Shërbimet e Policisë kanë bërë të mundur lokalizimin e tij në rrugën “Medar Shtylla” dhe falë ndërhyrjes në kohë është bërë e mundur kapja e tij.
Nga kontrolli fizik dhe në banesë këtij shtetasi iu gjet një armë zjarri pistoletë, me një krehër me fishekë luftarak. Nga verifikimet e bëra rezultoi se shtetasi G. Gj. ishte i shpallur në kërkim për llogari të DVP Vlorë, për veprën penale “Mashtrimi”. Materialet i kaluan Prokurorisë pranë Gjykatës së Shkallës së Parë Tiranë, për veprën penale “Mbajtja pa leje e armëve, armëve shpërthyese dhe municionit”.
