Dosja ‘Babale’/ Prokuroria jep pretencën për 4 të akuzuarit, ja çfarë kërkon për Ervin Salianjin

Gjatë seancës së sotme gjyqësore për dosjen “Babale”, Prokuroria ka kërkuar 1 vit e 6 muaj burg për ish-deputetin e Partisë Demokratike Ervin Salianji, dënim ky që do të konvertohet në 3 vite shërbim prove.

Gjithashtu mësohet se prokurori i çështjes, Kol Hysenaj ka kërkuar dënimin me 3 vite e 6 muaj burg për Albert Veliun, i cili akuzohet për ‘Kallëzim i rremë’ dhe ‘kalim të paligjshëm të kufirit’, ndërsa për Fredi Alizotin, 3 vite burg.

Ndërsa për gazetarin Jetmir Olldashi prokuroria ka kërkuar 1 vit burg, dënim ky që do të zëvendësohet me 200 orë punë publike të detyruara.

Kujtojmë se personat e mësipërm, në çështjen “Babale” akuzojnë vëllain e ish-ministrit të Brendshëm Fatmir Xhafaj, Agron Xhafaj e kanë fajësuar për lidhjen e tij me trafikun e  drogës.

Gjatë fjalës së tij prokurori Hysenaj pohoi se rezultoi e provuar se këta persona kanë bërë kallëzim të rremë të kryer në bashkëpunim, ndërsa kërkoi shpalljen e tyre të fajshëm.

Sipas organit të akuzës, regjistrimet e publikuara, ku flitej për pazare droge, nuk janë origjinale. “Nuk janë origjinale regjistrimet e publikuara. Në bisedën e 2 dëgjohet një zë i një burri të dytë. Kampioni i zërit të emërtuar ‘Agroni’ është i një cilësie të dobët. Ky zë nuk është i Agron Xhafajt. Salianji ka bërë kontaktin mes Albert Veliut dhe Jetmir Olldashit.”, mësohet të ketë thënë prokurori i çështjes. Nga ana tjetër, përfaqësuesi ligjor i Agron Xhafajt ka kërkuar në seancë gjykimin e fajtorëve.

Seanca e rradhës është caktuar më 18 dhjetor.

Avokatët kanë kërkuar kohë për të arritur në konkluzionet e nevojshme në mbrojtje të klientëve të tyre.