LIGJET E BIZNESIT
Presidenti Ilir Meta ndodhej sot i pranishëm në ceremoninë e vlerësimit të Forcës së Sigurisë së Kosovës, ku ka dekoruar pjesëtarët e njësisë së kërkim-shpëtimit në shenjë falenderimi për punën e bërë gjatë ditëve të fundit në Shqipëri pas tërmetit të fuqishëm 6.4 ballë që goditi Shqipërinë.
Në kazermën e forcës së Sigurisë së Kosovës “Adem Jashari” në Prishtinë u rreshtuan njësitet ushtarake dhe policore për të pritur Kreun e Shtetit shqiptar.
Në fjalën e tij Meta falenderoi edhe njësitë nga nstitucionet e tjera si KEK, Zjarrfikësit e Komunës se Suharekës, Miniera e Trepçës dhe Artanës, të cilëve u ndau dekorata.
Ai shtoi se çdo vend i NATO-s do të ishte i kënaqur me atë që ka shfaqur FSK gjatë ditëve të kërkim-shpëtimit në Shqipëri.
“Do të donim ta festonim 28 nëntorin me gjithë madhështinë që meriton kjo ditë e bekuar, do të donim ta festonim se bashku në Vlorë, Tiranë , Prishtinë e Prizren, Shkup e Nju Jork por ja që nuk ishte e thënë. Megjithatë ky 28 Nëntor na gjeti të bashkuar si asnjëherë më parë ne shqiptarët duke u përballur me pasojat katastrofike qe shkaktoi tërmeti i 26 nëntorit në Shqipëri. Kosova ishte e para që u ndodh atje menjëherë. Ekipet tuaja nuk ishin atje vetëm fizikisht por edhe njerëzisht e shqiptarisht duke rrezikuar jetën e tyre për të shpëtuar jetën e të tjerëve”, shtoi Meta.
Kryeministri në ikje Ramush Haradinaj falënderoi popullin e Kosovës për solidaritetin e treguar gjatë këtyre ditëve të renda për Shqipërinë e cila javën e kaluar u godit nga një tërmet i fuqishëm që la të vdekur dhjetëra persona e qindra të tjerë të lënduar e pa shtëpitë e tyre.
“Festa e 28 nëntorit sivjet na erdhi e ftohtë sepse u përballem me forcën e natyrës qe na mori shumë jetë njerëzore. Në ditët më të vështira na erdhën në ndihmë fqinjët e parë dhe shumë miq anë e kënd botës dhe kjo është dëshmi që jemi rreshtuar në rrugën e duhur, të paqes”, u shpreh Haradinaj.
