Ka nisur mbledhja e Komitetit Kombëtar të Rindërtimit në godinën e kryeministrisë.
Në fjalën e tij Rama premtoi transparencë në menaxhimin e fondeve dhe donacioneve në procesin e rindërtimit të banesave pas tërmetit të fuqishëm të 26 nëntorit.
Gjithashtu të pranishëm në mbledhje janë edhe krerët e organizatave bamirëse si Arbër Hajdari dhe Elvis Naçi.
“Duhet transparencë në përdorimin e të gjitha të ardhurave të mbledhura apo të vëna në dispozicion. Qeveria është përgjegjëse për atë çka janë vënë në dispozicion, por edhe pjesa tjetër duhet të jetë e monitoruar nga sistem transparent. Ashtu si edhe fondet e mbledhura nga organizatat edhe ato që vijnë si kontribute nga miqtë e Shqipërisë. Ky komunitet është garanti se programi i ndërtimit do të jetë fryt i kontributeve që nga ata që kanë derdhur shuma të mëdha deri te ai zotnia në Medvegjë që dha 10 euro nga pensioni i tij”, tha kreu i qeverisë.
Gjithashtu Rama ftoi sërish opozitën në tryezë, një ditë pasi kryetari i PD Lulzim Basha refuzoi ftesën e tij për tu takuar në lidhje me situatën emergjente të krijuar pas tërmetit.
“Doja që të ishte këtu edhe opozita, por ajo çka besoj e ndajnë me mua është barra kolosale e kësaj sfide. Është një sfidë e vështirë jo vetëm në aspektin financiar. Nuk është e thënë që nëse i ke fondet ke dhe suksesin nëse nuk arrijmë të organizohemi dhe koordinohemi si duhet”, u shpreh Rama ndër të tjera.
