“Stop menjëherë” Rama nuk ndalet, sërish ultimatum mediave: Do detyrohem t’i mbyll me forcë nëse…

Pas paralajmërimit të fortë që bëri sot në mëngjes gjatë mbledhjes me qeverinë për situatën pas tërmetit, kryeministri Edi Rama i ka drejtuar një tjetër ultimatum mediave.

Ai u ka bërë thirrje kanaleve të informimit, mediave, televizioneve dhe portaleve që mos të përhapin panik me lajmet që nxjerrin.

Me anë të një reagimi në rrjetet sociale, Rama shkruan se në këtë situatë duhet matur secila fjalë dhe është e patolerueshme që të publikohen sharlatanizma delirantësh vendas a të huaj.

Ndër të tjera kreu i qeverisë shton se nëse shikon lajme që përhapin panik apo të rreme do të detyrohet të ndërhyjë forcërisht për të mbyllur këto media.

“Në këtë situatë të jashtëzakonshme, ku duhet matur çdo fjalë është e patolerueshme që të publikohen sharlatanizma delirantësh vendas a të huaj apo të shtrembërohen, sipas avazit të zakonshëm, prononcimet e shpjegimet e arsyeshme të ekspertëve! STOP DHE STOP TANI! MENJËHERË!!!

Paralajmëroj për herë të fundit portalet e kanalet e informimit se nê kushtet dhe kuadrin ligjor te Gjendjes së Jashtezakonshme, do jem i detyruar te nderhyj forcerisht per mbylljen e tyre deri ne fund te kesaj faze dramatike, nese vazhdojne me lajme te rreme qe hapin panik!”- shkruan Rama në Twitter.