Në vijim të prezantimit të Paketës Speciale Anti-KÇK që po zhvillohet në ambientet e Ar-Turbinës, kryeministri Edi Rama ka paralajmëruar të gjithë punonjësit e administratës publike se do të kthehen nga gjobvënës të qytetarëve në shërbëtorët e tyre.
Ndër të tjera ai u shpreh se nga 1 janari do të nisë ofrimi i shërbimeve online për qytetarët të cilët nuk do të jenë më të detyruar të paraqiten më nëpër sportele për të marrë këtë shërbim.
Ai u shpreh se sportelistët në administrata ‘i kanë nxirë faqen’ qeverisë.
“Jo çdo shërbim mund të bëhet online komplet. Nga 1 janari do të jenë 40% e shërbimeve që do të jepen online. Deri në qershor do të shkojmë në 67% dhe në fund të vitit do të jenë thuajse 100% online. E para s’ka më kontakt midis qytetarit që shërbehet dhe atij që shërben, që na e nxinë jetën nëpër sportele. Qytetari duhet të aplikojë duke depozituar vetëm dokumentet e veta dhe jo ato që i jep shteti. Të gjitha të tjerat brenda që i jep shteti do t’i marrin ata që punojnë në sportele. Ata do kthehen nga gjobëvënës në shërbëtorë të qytetareve”, deklaroi kryeministri Rama gjatë fjalës së tij.
