Albin Kurti siguron shumicën në parlament, fiton mbështetjen e pakicave joserbe

Me këtë lëvizje, Kurti ka arritur të sigurojë shumicën në parlament me numrin e 61 deputetëve duke llogaritur edhe mandatet e LDK-së në rast se koalicioni paszgjedhor LDK-VV zyrtarizohet.

Me ane të ketij postimi në rrjetin social,  kreu i Vetëvendosjes, Albin Kurti ka shkruar se tashmë edhe kryetarët e tre partive të komuniteteve joshumicë, Rasim Demiri, Fikrim Damka dhe Albert Kinolli, do të votojnë qeverinë e ardhshme pa kushtëzime.

Postimi i plotë në Facebook:

“Në “Ambient” të Prizrenit, pavarësisht rinumërimeve dhe paneleve, u sigurua shumica parlamentare për qeverinë e re. Kryetarët e tri partive të komuniteteve joshumicë, njëkohësisht edhe deputetë të ardhshëm, zotërinjtë Rasim Demiri, Fikrim Damka dhe Albert Kinolli do ta votojnë qeverinë tonë dhe mua si kryeministër, pa kushtëzime”, ka shkruar Kurti, në një njoftim në FB.

Kurti ka bërë të ditur se me LDK’në janë marrë vesh të ndërtojnë Qeverinë sapo të certifikohen zgjedhjet e 6 tetorit.

Numërimi i votave ka përfunduar sot ndërsa ditët në vazhdim pritet të përmbyllet procesi paszgjedhor.

Kryeministri në ardhje, Albin Kurti, ka njoftuar se bashkëpunimi me amerikanët nderon Shtetin dhe kombin.

Nesër pritet të merret vendimi për certifikimin e zgjedhjeve dhe hapjes së rrugës për krijimin e Qeverisë së re.