Në kërkim nga policia, gjykata jep masën “arrest me burg” për Agim Kajmakun

Një ditë pasi prokuroria e Tiranës lëshoi urdhër-arrestin ndaj ish-kryetarit të Bashkisë Vorë Agim Kajmaku,gjykata ka caktuar masën e sigurisë “arrest me burg” për të.

Kajmaku do të përballet me 3 akuza: ’shpërdorim detyre’’, ‘’falsifikim të formularit të dekriminalizimit’’ si dhe ‘’ushtrim të funksioneve pas dhënies fund të detyrës’’.

Pas verifikimit se Kajmaku fshehu dënimin e tij në Greqi në 2003 për falsifikim parash dhe nuk e deklaroi në formularin e dekriminalizimit, Komisioni Qendror i Zgjedhjeve vendosi t’i hiqte atij mandatin e kryebashkiakut më 1 nëntor.

Tani policia e ka shpallur në kërkim Agim Kajmakun dhe ende nuk dihet vendndodhja e tij.

Ditën e djeshme janë kryer kontrolle nga policia në banesën e tij por gjetja e tij rezultoi e pamundur.

Edhe avokati i tij Isuf Shehu u shpreh se nuk kishte dijeni se ku ndodhej Agim Kajmaku.

Nga ana tjetër policia dyshon se ish-kryebashkiaku i Vorës mund të ketë dalë jashtë Shqipërisë.