Avokati i njohur Spartak Ngjela ka sulmuar ashpër kryeministrin Edi Rama në lidhje me qëndrimin e tij për izolimin e Kosovës nga marrëveshjet rajonale.
Ngjela ka komentuar edhe samitin e Ohrit, ku Rama gjatë konferencës përpara gazetarëve ka sulmuar liderët e Kosovës.
Avokati shton se Edi Rama u rreshtua me forcat pro-serbe në Tiranë.
Ndër t ë tjera ai thekson se SHBA do të godasë këtë politikë anti-shqiptare dhe kundër interesave të saj, kurse Edi Rama do të jetë personi që do të marrë kosto politike dhe personale.
“A do ta lejojë politika amerikane shengenin ballkanik të Edi Ramës dhe Aleksandër Vuçiçit, ngritur kundër botës shqiptare në Ballkanin Perëndimor?
Të shohim.
Kosova nuk e pranoi dje këtë ndërmarrje, dhe nuk kishte sesi. Domethënë, ky është qëndrimi amerikan? Po. Shenjat janë që ky është edhe qëndrimi amerikan – mospranimi.
Forcat proserbe në Tiranë e konsideruan “izolim të Kosovës” shengenin e Ramës. Që ta shtynin edhe Kosovën te Serbia. Naivitet politik. Këta, ca ekscentrikë në Tiranë, do të mundin politikën amerikane në Shqipëri dhe në Kosovë?!!
Të gjithë bashkë janë trembur nga rreforma antikorrupsion, dhe kanë shkuar në Beograd: këto janë shenjat.
Nëse amerikanët do ta godasin këtë ndërmarrje antishqiptare të Ramës, shqiptarët patjetër që do ta flakin Edi Ramën, sepse, pas kësaj, ata duhet ta hedhin atë poshtë, mu si një copë rreckë. Ta shohim…”, shprehet avokat Ngjela.
