LIGJET E BIZNESIT
“Politika e Shteteve të Bashkuara të Amerikës në Ballkanin Perendimor”. Është ky titulli i konferencës shkencore që Universiteti Mesdhetar u Shqipërisë do të organizojë në Tiranë. Përgjatë dy ditëve (28 – 29 tetor 2019) në Hotel Tirana International do të referojnë për këtë temë krerët më të lartë të shtetit shqiptar, përfaqësues të trupit diplomatik të akredituar në Tiranë, historianët dhe studiuesit më të njohur, vendas dhe të huaj të politikës së jashtme të SHBA-së dhe marrëdhënies me vendet e Ballkanit Perendimor.
Dita e parë e konferencës (28 tetor) do të çelet me sesionin plenar, gjatë së cilit do të diskutohet për politikën e jashtme të SHBA-së në një botë që ndryshon.
Referues do të jenë Prof. Dr. Anastas Angjeli, President i Universitetit Mesdhetar të Shqipërisë, i cili do të mbajë edhe fjalën e hapjes së Konferencës; Leyla Moses-Ones, e Ngarkuara me Punë në Ambasadën e SHBA-së në Tiranë; Edi Rama, Kryeministër i Republikës së Shqipërisë; Prof. Daniel SerëerDrejtor i Programit të Menaxhimit të Konflikteve dhe Politikës së Jashtme Amerikane në Shkollën e Studimeve Ndërkombëtare të Avancuara të Universitetit “John Hopkins” etj.
Pjesë e konferencës do të jetë edhe Thomas A. Shannon, Jr., Ambasador Karriere në SHBA, ish nën Sekretar Shteti për Çështje Politike, SHBA (Keynote Speaker) , i cili do të referojë për “Politika e jashtme e SHBA në një periudhë pasigurie – Çfarë mund të presë Shqipëria”.
Sesioni i parë do të fokusohet në tema të tilla si: Politika e jashtme amerikane në një sistem ndërkombëtar dinamik; Rajoni i Ballkanit ndërmjet ndikimit të historisë dhe sfidave aktuale; vlerësim kritik i politikës së jashtme amerikane për rajonin; bashkëpunimi SHBA-BE për integrimin evropian të Ballkanit Perëndimor.
Diskutimet interesante për politikën e jashtme të SHBA-së në rajon do të vijojnë edhe në ditën e dytë të Konferencës Shkencore të UMSH-së. Paneli i parë do të fokusohet në tematikën “Historia e Marrëdhënieve Ndërkombëtare dhe Diplomacisë – Nga Orientalizmi në Socializëm drejt Integrimit Euro-Atlantik. Ballkani Perëndimor në shek. XX-XXI”.
Ndërsa në panelin e dytë do të diskutohet për gjendjen aktuale të Marrëdhënieve Ndërkombëtare – Politika e SHBA dhe ajo e BE-së kundrejt Ballkanit Perëndimor. Në panelin e tretë referuesit do të diskutojnë për qasjet teorike të marrëdhënieve ndërkombëtare dhe studimeve të sigurisë – sfidat e sigurisë transAtlantike në Ballkanin Perëndimor.
Ata do të sjellin gjithashtu, raste nga rajoni për debatet aktuale në Bashkimin Europian në periudhën e krizës dhe post krizës. Ekspertët dhe akademikët do të diskutojnë për sfidat e Ballkanit Perendimor në raport me sigurinë, stabilitetin dhe emigrimin, rrezikun nga terrorizmi ndërkombëtar dhe pasojat për rajonin.
