Mbrëmjen e djeshme, kryeministri Edi Rama u shpreh në emisionin “Opinion” se do të padisë kryeministrin e Kosovës Ramush Haradinaj.
Ai tha se pas deklaratës së Ramushit kur tha se Rama, Hashim Thaçi dhe Aleksandar Vuçiç do të merrnin 10 miliardë për ndarjen e Kosovës, zyra e tij po përgatit padinë ndaj Haradinajt.
Ndërkohë sot, në një lidhje telefonike me “News24”, Haradinaj tha se Rama ka të drejtat e veta, ndërsa shtoi edhe njëherë se është kundër ndarjes së territorit të Kosovës dhe do ta mbrojë deri në fund qëndrimin e tij.
“Sot kam parë disa tituj të portaleve në Kosovë. Por se kam përcjell direkt intervistën e tij. E kam shprehur qëndrimin tim në lidhje me refuzimin dhe kundërshtimin e ndarjes së territoreve, që ka qenë një maskim për ndarjen e Kosovës. Ajo do kishte pasoja të mëdha për planin politik të Kosovës dhe humbje të madhe për të. Rezervat më të mëdha në Europë gjendjen në Trepçë. Këto kanë qenë vendim legjitim i imi. S’kam koment për deklarata të tjera. Ai ka të drejtat e veta, ia respektoj. Unë i kam mbajtur ato qëndrime legjitime dhe vazhdoj t’i mbaj. Për Atdheun para se gjithash. S’dua të kaloj në qasje të tjera. I kam vëllezër kudo që janë shqiptarët, edhe të majtët dhe të djathtët. Detyra ime në mbrojtje të Kosovës, kjo është tokë e shqiptarëve, e të gjithë neve. Qëndrimi im kundër ndarjes është legjitim. I respektoj të gjitha të drejtat e kryeministrit, apo dhe të qytetarëve shqiptarë”, u shpreh Haradinaj
