Zbardhet drafti i Partisë Socialiste për ndryshimet në Kodin e Reformës Zgjedhore..
Në këto ndryshime përfshihet barazia gjinore, fushata zgjedhore duke filluar nga financimi i partive politike, financimin e fushatës dhe monitorimin e fushatës, si dhe keqpërdorimi i administratës publike.
Propozimet e bëra do të paraqiten ditën e nesërme gjatë mbledhjes që do të zhvillojë Komisioni i Posacëm për Reformën Zgjedhore.
Sipas draftit duhet të jenë të paktën 30% gra në Kuvend dhe 50% në qeverisjen vendore, por nuk përfshihet depolitizimi i administratës Zgjedhore.
“Kodi Zgjedhor nxit barazinë gjinore për organet e zgjedhura dhe administratën zgjedhore përmes:
- a) vendosjes së kuotave gjinore në jo më pak se 30 përqind të përbërjes së Kuvendit të Shqipërisë dhe 50 përqind të organeve të njësive bazë të qeverisjes vendore,
- b) vendosjes së kuotave gjinore në jo më pak se 30 përqind të përbërjes së të gjithë niveleve të administratës zgjedhore”, kërkon PS, teksa propozon ndryshime edhe në pikën 21 të nenit 1 në Kodin Zgjedhor.
“21. Shpenzime të fushatës zgjedhore” janë shpenzime të bëra nga ose në emër të një partie politike të regjistruar si subjekt zgjedhor, përfshirë kandidatët dhe/ose degët e saj, ose nga një kandidat i pavarur, për të promovuar një parti, kandidatët e saj ose një kandidat të pavarur në zgjedhje, ose përpjekjen për të dëmtuar perspektivën e një partie tjetër, kandidatëve të partisë tjetër ose një kandidati të pavarur”, thuhet në draft, ndërsa kërkohet që të gjitha institucionet publike, qendrore dhe vendore, të raportojnë në KQZ të gjitha veprimtaritë gjashtë muaj para datës së zgjedhjeve.
“Në rast se KQZ-ja, kryesisht ose me kërkesë të të tretëve, konstaton nga informacioni sipas pikës 2 të ketij neni, se veprimtaria mund të përbëjë keqpërdorim të burimeve shtetërore, atëherë ajo urdhëron ndalimin e zhvillimit të saj. Ndalimi kryhet nëpërmjet vendosjes së shënimit “Ndaluar nga KQZ” në ndërfaqen e raportimit, në pjesën që i takon veprimtarisë. Shënimi “Ndaluar nga KQZ” vendoset jo më vonë se 24 orë nga raportimi. Informacioni sipas kësaj pike është i aksesueshëm nga të gjithë përdoruesit e ndërfaqes nga momenti i hedhjes së të dhënave deri në datën e shpalljes së rezultatit përfundimtar të zgjedhjeve”, thuhet në draftin e PS.
