Ditën e sotme kryetari i Partisë Demokratike Lulzim Basha ka deklaruar se zgjedhjet e parakohshme parlamentare do të mbahen në një dite me ato lokale.
Basha ka mbledhur në selinë blu, ish-deputetët e PD dhe Kryesinë e partisë, në kuadër të përgatitjeve të partisë më të madhe opozitare për riorganizimin e strukturave dhe zgjidhjen e krizës politike.
Mësohet se kreu demokrat ka deklaruar se ospioni i vetëm për zgjidhjen e krizës mbeten zgjedhjet e parakohshme.
Basha është shprehur se zgjidhja e krizës në vend ka hyrë në fazën finale, duke kërkuar kështu përgatitjen e strukturave për zgjedhje të parakohshme.
Po kështu, kreu demokrat ka deklaruar prerë se nuk duhet të ketë asnjë iluzion se aksioni opozitar do të ndërpritet apo do të ketë tërheqje prej tij.
Referuar raportit të OSBE/ODIHR për 30 qershorin, por edhe rezolutës së Bundestagut, Basha mësohet të ketë thënë se ato përbëjnë skanimin më të mirë të situatës në vend.
“ Zgjidhja e krizës, që mbetet imperativ dhe objektiv kryesor yni, vjen vetëm duke iu drejtuar sovranit me zgjedhje të lira e të ndershme”, mësohet të jetë shprehur kreu demokrat.
Në këtë kuadër, Basha kërkoi jo vetëm nga ish-deputetët dhe anëtarët e Kryesisë, por nga të gjithë anëtarët e forumeve drejtuese dhe degëve, që të zbresin në terren, të nisin diskutimet me qytetarët mbi alternativën e PD-së për nxjerrjen e vendit nga kriza.
“Zgjedhjet do të mbahen në 1 ditë, ndaj të gjithë duhet të jemi në terren”, ka deklaruar Basha.
