Kryemadhi zbardh takimin me Bashën në selinë blu: Opozita ka gati zgjidhjen e krizës

Për mëse një orë, kryetarja e LSI, Monika Kryemadhi ka qenë në selin blu në takim me kryedemokratin Lulzim Basha dhe aleatët opozitar. Ajo ka deklaruar se opozita e bashkuar nuk do të hedhë hapa pas, por do të vijojnë të ecin përpara me platformën e PD-së, pasi vetëm  nëpërmjet saj, theksoi Kryemadhi, mund të zgjidhet kriza.

“Ajo çfarë zoti Basha deklaroi 3 orë më përpara është përsëritje e çdo gjëje pas një akordimi që kemi pasur nëpërmjet telefonatave të të gjithë bashkëkryetarët e Frontit Opozitar. Ne jo vetëm që nuk lëvizim asnjë presje nga qëndrimet tona, por do të vazhdojmë të ecim përpara me platformën që opozita ka gati për zgjidhjen e krizës.

Jemi duke punuar grupet e punës për platformën, e sigurisht në tryezë nuk ulet vetëm një njeri, por janë të gjithë personalitetet, njerëzit me integritet dhe me vlera të të gjithë partive politike. Mos harroni se Fronti Opozitar tashmë është 85 përqind e shqiptarëve”, tha Kryemadhi.