Në kulmin e një krize politike dhe institucionale që po kalon Shqipëria, ka ardhur edhe ndërhyrja e parë nga ndërkombëtarët.
Mësohet se OSBE ka thërritur një tryezë të përbashkët me të gjitha partitë politike në Shqipëri.
Tryeza do të mblidhet më 25 shtator dhe do të jetë për reformën zgjedhore.
Në të do të jenë të ftuara parti parlamentare dhe jashtë parlamentare.
Ende nuk dihet qëndrimi që do të mbajë Partia Demokratike apo dhe partitë e tjera opozitare.
Kujtojmë se ditën e djeshme në një prononcim për mediat, kreu i PD-së Lulzim Basha deklaroi se zgjidhja e krizës duhet të gjendet nga brenda, dhe se ndërkombëtarët janë të mirëpritur për të dhënë ndihmën e tyre, por jo të shërbejnë si negociues.
Reforma Zgjedhore është një nga kërkesat e vazhdueshme të ndërkombëtarëve në vendin tonë, dhe që kërkon angazhimin e të gjitha forcave politike, por me tërheqjen nga Kuvendi PD dhe aleatët e saj, kanë ndërprerë punën dhe për këtë reformë.
