Shqiptarët sigurojnë makinat, por jo shëndetin dhe jetën. Të dhënat e fundit të Autoritetit të Mbikëqyrjes Financiare tregojnë se në shtatë muajt e parë të vitit 2019, për sigurimin e automjeteve që është i detyrueshëm me ligj, primet arritën në mbi 5.9 milionë lekë, me rritje 5.2% kundrejt të njëjtës periudhë të një viti më parë.
Aktualisht, 66.76% e totalit të tregut të sigurimeve në Shqipëri përbëhet nga sigurimi i automjeteve, që është i detyrueshëm me ligj.
Ndërkaq, pavarësisht përhapjes masive të zjarreve në të gjithë vendin, duket se sigurimi i shqiptarëve kundër fatkeqësive natyrore është në nivele të ulëta. Sipas të dhënave zyrtare të AMF-së. primet e sigurimit në këtë segment u evidentuan në rënie me 24.4%.
Sipas të dhënave, primet e sigurimit vullnetar arritën në rreth 3.7 milionë lekë gjatë periudhës janar-korrik, në rritje të lehtë krahasuar me të njëjtën periudhë të vitit 2018. Në rritje evidentohen edhe dëmet e paguara nga kompanitë e sigurimit, ku kontributin më të madh, rreth 56.9% të totalit e kanë dhënë pagesat për sigurimin motorik.
