Ministri i Mjedisit dhe Turizmit sot ishte përgatitur për shoun e radhës me turistët e huaj që kalojnë eksperienca të pakëndshme në vendin tonë.
Rasti është ai i turistit polak që dje u shpëtua nga forcat e ushtrisë, pasi kishte rënë në një greminë dhe kishte marrë disa dëmtime në gjymtyrë.
Siç bëri me spanjollët që u sulmuan nga Mihali, edhe këtë herë ministri Klosi kishte marrë me vete “një ushtri” me gazetarë dhe kamera për të parë nga afër gjendjen e të riut.
Bashkë me një buqetë dhe dhurata të tjera, Klosi kur hyri në dhomën e spitalit, ku turisti polak po mjekohet është befasuar nga kërkesa e këtij të fundit. Ai sapo ka parë ministrin i ka kërkuar që të largojë kamerat, pasi nuk dëshiron që të ekspozohet në medie.
I gjendur para kësaj kërkese shtangëse, Klosi është detyruar t’i kthejë mbrapsht kamerat dhe gazetarët, duke çuar dëm gjithë mundin për të trumbetuar me të madhe sukseset e lavdishme të turizmit shqiptar këtë verë.
