Detaje të reja kanë dalë nga vrasja që tronditi mbrëmë kryeqytetin, ku pas një atentati në makinën e tij tip “BMW X5” në rrugën “Xhanfize Keko”, mbeti i vrarë ish-efektivi i policisë Santiago Malko.
Mësohet se në vitin 2016 Malko ka qenë i përfshirë në një konflikt me dy vëllezërit Lashi, Edmond dhe Gentian, në rrugën “Islam Alla” në Tiranë, vetëm pak metra larg Drejtorisë së Policisë.
Si Edmondi, ashtu edhe Santiago kishin në pronësi nga një pikë lotoje në këtë zonë dhe shkak i këtij sherri ka qenë një borxh prej 1 mijë eurosh.
Ka qenë ish-polici Santiago Malko që ka shkuar në pikën e basteve të vëllezërve Lashi dhe është konfrontuar fizikisht me ta. Malko ka nxjerrë armën dhe ka tentuar të godasë njërin prej vëllezërve, por këta të fundit ja kanë marrë pistoletën nga dora dhe ia kanë vënë në kokë.
Në atë kohë policia la të lirë dy vëllezërit Lashi dhe shoqëroi në komisariat, ish-policin Santiago Malko
Gjithashtu ish-efektivi Santiago Malko ka qenë i përfshirë në ngjarjen e 4 tetorit 2018, ku dhe ndodhi vrasja e Fabian Gaxhës në ish-Bllok pas një përplasjeje me armë.
Ish-efektivi është personi që futet me kapele në lokalin “Monopol”, gjë që e bën të paidentifikueshme fytyrën e tij nga kamerat e sigurisë. Pavarësisht Far-Westit të ndodhur brenda në lokal, Malko largohet mjaft i qetë nga bari, sërish me kapele.
Santiago Malko u shpall në kërkim nga policia për këtë ngjarje.
Pas qetësimit të situatës mësohet se Malko është vetëdorëzuar në polici, ku ka shpjeguar se nuk kishte lidhje me ngjarjen dhe është lënë i lirë.
26-vjeçari që mbeti i vrarë një natë më parë në makinën e tij tip “BMW X5” ishte pjesë e bandës së Ervis Martinajt, i njohur ndryshe si bosi i lojërave të fatit. Malko kishte gjithashtu në pronësi disa pika bastesh sportive.
Ish-efektivi ka shërbyer për një vit në radhët e policisë dhe më pas është përjashtuar.
Ai njihet në kartotekën kriminale të policisë si kontigjent kriminal, dhe i përfshirë në disa ngjarje me armë në Tiranë. Pavarësisht gjtihçkaje, Malko ka lëvizur gjithmonë i lirë në kryeqytet.
