Në kuadër të bashkëpunimit mes policisë greke dhe asaj shqiptare një sasi prej mbi 1 tonë drogë është sekuestruar nga policia greke, e cila u gjet në një anije me vela, ndërsa destinacioni i saj ishte Turqia.
Menjëherë pas kapjes nga autoritet greke të mjetit lundrues, policia shqiptare është vënë në dijeni, për të dhënat e mjetit dhe personat në bord me qëllim verifikimin e tyre, të ndaluarit janë shtetas ukrainas.
Nga verifikimi i bërë mjeti lundrues Veleria “MY DREAM” i kapur me drogë dhe dy personat ukrainas në bord, nuk kanë hyrje-dalje në Shqipëri.
Njëkohësisht gjatë kësaj periudhe nuk është konstatuar as nga Policia Kufitare asnjë rast i dyshimtë, i ndonjë mjeti lundrues që të ketë lundruar në drejtim të Greqisë, apo të vendeve të tjera fqinje.
“Sqarojmë faktin se në 15 gusht në Sarandë ka hyrë një mjet lundrues Yaht me emrin “Dream” me 3 shtetas turq në bord, të cilët kanë kryer proceduara të rregullta hyrje-dalje dhe mjeti është kontrolluar konform rregullave nga Policia Kufitare. Ky mjet nuk ka asnjë lidhje me mjetin lundrues Veleria të kapur me drogë në Greqi.”- shkruan policia shqiptare edhe pse dyshimet janë që sasia e lëndës narkotike të jetë nisur nga vendi ynë.
Policia e Shtetit fton dhe qytetarët të denoncojnë përmes numrit 112 apo Komisariatit Dixhital për çdo informacion të vlefshëm, për të ndërtuar së bashku më shumë siguri.
