Menjëherë pas konstituimit të Këshillit Bashkiak në Shkodër ka ardhur dhe reagimi i Kreut të Grupit Parlamentar të Partisë Socialiste Taulant Balla.
Balla nëpërmjet një reagimi në Facebook, shkruan se u kërkon ndjesë qytetarëve shkodranë për situatën e krijuar pas dorëheqjes së Valdrin Pjetrit dhe shton se ligji është i barabartë për të gjithë dhe duhet të funksionojë po njësoj.
STATUSI I PLOTE I TAULANT BALLES
‘’Sot shkodranët kanë ‘kuvendin’ e tyre të ri lokal, të përbërë nga 51 këshilltarë bashkiakë të zgjedhur në Zgjedhjet Vendore të 30 Qershorit. Duke i uruar Këshillit të ri bashkiak urime në punën e tij shumë të rëndësishme, Partia Socialiste i shpreh ndjesë komunitetit të nderuar të Bashkisë së Shkodrës për situatën e krijuar pas dorëheqjes së detyrueshme të Kryetarit të zgjedhur të Bashkisë, por si në çdo rast ne qendruam përtej çdo interesi partiak, politik apo individual, vetëm në anën e ligjit dhe të interesit publik.
Si në çdo rast, kur mes palëve politike përfshihen institucionet ligjzbatuese dhe kur bëhet fjalë për raportin e individit me ligjin, Partia Socaliste nuk investohet në asnjë debat. Ligji është i barabartë për të gjithë dhe ai vetëm duhet zbatuar nga kushdo.
Në lidhje me kompetencën e Këshillit Bashkiak në raport me Kryetarin e Bashkiksë, në mbledhjen e parë të Këshillit Bashkiak u konstatua fakti i mosparaqitjes së fituesit si Kryetar Bashkie Shkodër në zgjedhjet e datës 30 qershor 2019, Z. Valdrin Pjetri për të bërë betimin në përputhje me ligjin.
Sa më sipër, institucionet e ngarkuara nga Kushtetuta dhe ligji duhet të marrin përgjegjësitë që u takojnë në situatën e krijuar’’.
