Rama e quajti barbar, Kokëdhima: Unë e kam edhe mik

Mihal Kokëdhima, pronari i një lokali në Porto Palermo të Himarës që sulmoi një grup turistësh spanjollë ka dalë sot para Gjykatës së Vlorës për t’u njohur me masën e sigurisë. Mbi të rëndojnë 3 akuza: “Kanosje”, “Dëmtime të tjera me dashje” dhe “Shkatërrim te pronës”.

Gjatë procesit, Kokëdhima ka bërë një deklaratë të papritur. Ai ka komentuar postimin në facebook të kryeministrit Edi Rama, i cili e quajti barbar që shkeli mbi kodin e mikpritjes, duke thënë: “Unë e kam edhe mik”.

Pak ditë më parë, Mihal Kokëdhima sulmoi një grup me turistë spanjollë, të cilët ishin larguar nga lokali i tij, pasi ishin të pakënaqur nga shërbimi.

Pamjet që tashmë kanë pushtuar rrjetet sociale tregojnë sesi 51-vjeçari u kap për 3 kilometra pas mjetit ku udhëtonte familja spanjolle dhe dy guidat e tyre, në përpjekje për t’i ndaluar dhe për t’u konfliktuar me ta.